კახა კალაძე - „გირჩი“ არ მალავს ქვეყანაში დაპირისპირებასა და არეულობის ზრახვებს - თუ ვინმე ფიქრობს, რომ რევოლუციით, მთავრობის დამხობითა და ჩამოგდებით რამეს მიაღწევს, ძალიან ცდება
თბილისის მერის, კახა კალაძის განცხადებით, პარტია „გირჩი“ არ მალავს, რომ მისი განზრახვა ქვეყანაში არეულობა და დაპირისპირებაა.
როგორც კალაძემ „ქართული ოცნების“ ოფისში ბრიფინგზე აღნიშნა, საზოგადოებამ უნდა იცოდეს, რომ თუ დეკემბერში ევროკავშირის კანდიდატის სტატუსს არ მოგვცემენ, ოპოზიციას სურს, ეს ქვეყანაში არეულობისთვის გამოიყენოს.
„გირჩი“ არ მალავს იმ ზრახვებს, რაც აქვს. ეს ქვეყანაში დაპირისპირებასა და არეულობას გულისხმობს. ერთ-ერთ ინტერვიუშიც წამოსცდათ, რომ კანდიდატის სტატუსის არმოცემასთან დაკავშირებით გეგმები აქვთ. თქვეს, დეკემბერში, სტატუსს რომ არ მოგვცემენ, სიტუაცია უფრო გამწვავდებაო.
ჩვენ სტატუსის მიღებას ნამდვილად ვიმსახურებდით. სავარაუდო ქვეყნებს შორის, თუ რომელიმეს რაიმე ჰქონდა გაკეთებული და ნაბიჯები წინ ჰქონდა გადადგმული, ეს ნამდვილად იყო საქართველო. მეორე მხრივ, ყველამ ძალიან კარგად უნდა იცოდეს, რომ თუ დეკემბერში სტატუსს არ მოგვცემენ, ოპოზიციას სურს, ეს ქვეყანაში არეულობისთვის გამოიყენოს. ფიქრობენ, რომ ეს ქვეყანაში ხელისუფლების შეცვლით დასრულდება.
სიტყვის, გამოხატვისა და შეკრების თავისუფლება ამ ქვეყანაში დაცულია და თუ ვინმეს ამის სურვილი აქვს, შეუძლია ამა თუ იმ ფორმით აზრი დააფიქსიროს, მაგრამ ეს კანონის ფარგლებში უნდა მოხდეს. თუ ვინმე ფიქრობს, რომ რევოლუციით, მთავრობის დამხობითა და ჩამოგდებით ამ ქვეყანაში რამეს მიაღწევს, ძალიან ცდება. ასეთ ქმედებებს, სახელმწიფოს შესაბამისი უწყებების მხრიდან ყოველთვის მკაცრი რეაგირება მოჰყვება“, - განაცხადა თბილისის მერმა.
