თუ რუსული ოცნება გონს არ მოეგება, ეს სანქციები გაგრძელდება - ჩვენდა სამწუხაროდ, სასამართლო თავიდან ფეხებამდე კორუფციაშია, - ამის შესახებ „ნაციონალური მოძრაობის“ თავმჯდომარე ლევან ხაბეიშვილმა ჟურნალისტებს განუცხადა, რითაც აშშ-ს მიერ მოსამართლეების დასანქცირებას გამოეხმაურა.

როგორც ხაბეიშვილი განმარტავს, ხელისუფლების მაღალი თანამდებობის პირები, მათ შორის, პროკურორები ზეწოლას ახორციელებენ სასამართლოზე.

"ყველა კარგად უნდა დაფიქრდეს და გაიაზროს, როცა ამერიკის სახელმწიფო დეპარტამენტი ამბობს, რომ ქრთამისტები არიან და ღამე ხორციელდება ზარები. საუბარი იმაზე კი არ არის, რომ ეს ოთხი მოსამართლე ერთმანეთში საუბრობდა, საუბარია იმაზე, რომ ხელისუფლების მაღალი თანამდებობის პირები, მათ შორის, პროკურორები ზეწოლას ახორციელებენ სასამართლოზე. დარწმუნებული ვარ, რომ ეს სანქციები 4 მოსამართლეზე არ გაჩერდება. ამ ადამიანებს ჰყავდათ დამკვეთები, ის ადამიანები, ვინც ღამე ახორციელებდნენ ზარებს, მათ შორის ამ ადამიანების მეშვეობით ალაგებდნენ სასამართლოში კონკრეტულ საქმეებს.

ყველამ კარგად უნდა იცოდეს, რომ მათაც მოეთხოვებათ პასუხი. თუ რუსული ოცნება გონს არ მოეგება, ეს სანქციები გაგრძელდება. მარტო ირაკლი შენგელია, რომ დაგიხასიათოთ თავისი დინასტიით, რომელიც სასამართლოშია წარმოდგენილი, საზოგადოება მიხვდება, რომ კლანთან, ნეპოტიზმთან, კორუფციულ მმართველობასთან გვაქვს საქმე. ჩვენდა სამწუხაროდ, სასამართლო თავიდან ფეხებამდე კორუფციაშია“, - აღნიშნავს ხაბეიშვილი.

ცნობისთვის, აშშ-მ მიხეილ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს სანქციები დაუწესა. ქართველი მოსამართლეების სანქცირების შესახებ აშშ-ის სახელმწიფო მდივანმა ენტონი ბლინკენმა განცხადება გაავრცელა, რომლის თანახმად, ამერიკის სახელმწიფო დეპარტამენტი მიხეილ ჩინჩალაძის, ლევან მურუსიძის, ირაკლი შენგელიას და ვალერიან ცერცვაძის საჯარო სანქცირებას ახდენს, ვიზის აკრძალვის შესახებ 7031(c) წესის საფუძველზე, მნიშვნელოვან კორუფციულ საქმიანობაში მათი ჩართულობის გამო.

როგორც განცხადებაში ბლინკენი განმარტავს, აღნიშნულმა პირებმა, ბოროტად გამოიყენეს მათი თანამდებობა როგორც სასამართლოს თავმჯდომარეებმა და იუსტიციის უმაღლესი საბჭოს წევრებმა, რითაც ზიანი მიაყენეს სამართლის უზენაესობასა და საზოგადოების ნდობას საქართველოს სასამართლო სისტემის მიმართ.