რამაზ საყვარელიძე - ვერ ვიტყოდი, რომ მელიას ხაბეიშვილით შეცვლის შემდეგ ეფექტურობა გაიზარდა - აქციის გაბარიტები დიდად შთამბეჭდავი არ იყო
გაგრძელდა „ნაციონალური მოძრაობის“ გასაჭირი, - ასე შეაფასა პოლიტოლოგმა რამაზ საყვარელიძემ გუშინ, რუსთაველის გამზირზე გამართული საპროტესტო აქცია.
მისი თქმით, „ნაციონალური მოძრაობის“ თავმჯდომარის შეცვლას გარკვეული სიახლეები უნდა მოეტანა, თუმცა ერთთვიანი აქტიური მუშაობის მიუხედავად, ეს აქციის გაბარიტებზე არ აისახა.
„ხალხის რაოდენობის მხრივ აქცია არ იყო იმ მასშტაბების, რომ ყურადღება მიექცია და საერთოდ, საზოგადოებამაც და ტელესივრცემაც ნაკლები ყურადღება დაუთმო გუშინდელ ოპოზიციურ აქციას.
გაგრძელდა „ნაციონალური მოძრაობის“ გასაჭირი, ეს ახალი არ არის - აქციებზე ხალხს „ნაციონალური მოძრაობა“ ვეღარ კრეფდა. გამოიცვალა თავმჯდომარე, თითქოს ამას სიახლე უნდა მოეტანა აქციების შედეგში, მაგრამ, პრაქტიკულად, შედეგი იგივე დარჩა.
შეიძლება მე თვალი მატყუებს, მაგრამ ვერ ვიტყოდი, რომ მელიას ხაბეიშვილით შეცვლის შემდეგ ეფექტურობა გაიზარდა, აქციის გაბარიტები ამ მხრივ დიდად შთამბეჭდავი არ იყო, თანაც ამას თუ დავუმატებთ იმას, რომ მართლაც ერთი თვე მიდიოდა რაიონებში მუშაობა და ფაქტობრივად, გუშინდელ რაოდენობაში რაღაც ნაწილი ჩამოყვანილი ხალხი იყო“, - განაცხადა რამაზ საყვარელიძემ.
