ლევან ხაბეიშვილს ურჩევნია, საკუთარ მხარდამჭერებს აუხსნას, საერთოდ იყო თუ არა წარმატებული ეს აქცია, ნაცვლად იმისა, რომ ოპოზიციაში ეძებოს თვითმარქვია ოპოზიციონერები, რომელიც ისედაც ვიცით, ვინც არიან, - ამის შესახებ „ლელოს“გენერალურმა მდივანმა ირაკლი კუპრაძემ „ნაციონალური მოძრაობის“ თავმჯდომარის, ლევან ხაბეიშვილის განცხადების საპასუხოდ აღნიშნა, რომლის მიხედვითაც, ის თვითმარქვია ოპოზიციის გამორკვევასთან გეგმავს.

როგორც კუპრაძე ამბობს, ერთ-ერთი მკაფიო და მძაფრი ოპოზიციური პარტია „ქართული ოცნების“ წინააღმდეგ, არის „ლელო“.

„ლევან ხაბეიშვილს ურჩევნია, რომ საკუთარ მომხრეებს, მხარდამჭერებს მარტივად აუხსნას, იყო თუ არა წარმატებული საერთოდ, გუშინდელი აქცია, რა მიზანს ემსახურებოდა და ამ მიზნის რაიმე პროცენტული მაჩვენებელი შესრულდა თუ არა, ნაცვლად იმისა, რომ ოპოზიციაში ეძებოს თვითმარქვია ოპოზიციონერები, რომელიც ისედაც ვიცით, ვინც არიან. ჩვენ ვართ ერთ-ერთი მკაფიო და მძაფრი ოპოზიციური პარტია „ქართული ოცნების“ წინააღმდეგ, რომლის ლიდერებსაც პოლიტიზირებული სასამართლო და პროკურატურა დევნის. თვითმარქვია ოპოზიციაზე როცა ვსაუბრობთ, მე ვგულისხმობ იმ საპარლამენტო პარტიებს, რომლებიც„ქართულ ოცნებას“ ემსახურებიან და ეხმარებიან უამრავი საკანონმდებლო ინიციატივის გატანაში. ამის მიღმა ოპოზიციურ პარტიებში რაღაც ახალი განტევების ვაცის ძებნა მაშინ, როცა „ნაციონალური მოძრაობის“ მიერ დაანონსებული პროცესები არც თუ ისე წარმატებით მიმდინარეობს, მგონია, რომ უბრალოდ, ყურადღების გადატანაა სხვა მიმართულებით. „ლელოსთვის“ ამ აქციის ამოცანები და მიზნები დაანონსების დღიდანვე გაურკვეველი და ბუნდოვანი იყო, შესაბამისად ვთქვით, რომ არ ვმონაწილეობდით ამ პროცესში და როგორც გამოჩნდა, „ლელოს“ პოზიცია ამ შემთხვევაშიც მართებული ხაზი იყო“, - აცხადებს ირაკლი კუპრაძე.