ივანიშვილის რეჟიმი სწორედ ამ კორუმპირებულ მოსამართლეებსა და კორუმპირებულ სასამართლო სისტემაზე დგას და ძალაუფლებას მათი მეშვეობით ინარჩუნებს, - ამის შესახებ ფრაქცია „ნაციონალური მოძრაობის" დეპუტატმა თინა ბოკუჩავამ ჟურნალისტებთან განაცხადა.

ბოკუჩავას შეფასებით, გასაკვირი არ არის, რომ აშშ-ს მიერ სანქცირებულ მოსამართლეებს პრემიერი ღარიბაშვილი არ ემიჯნება და მათ მხარდაჭერას უცხადებს.

ოპოზიციონერი დეპუტატის თქმით, სახელმწიფო არ იღებს ზომებს, რასაც მოცემულ შემთხვევაში ნორმალური ხელისუფლება მიიღებდა.

„როდესაც ასეთ მძიმე ინსტრუმენტს იყენებს საქართველოს სტრატეგიული პარტნიორი, რომელსაც გადამწყვეტი სიტყვა ეთქმის მათ შორის საქართველოს ნატო-ში ინტეგრაციაზე და მოსამართლეებს სანქციებს უწესებს, ამაზე ნორმალური და ადეკვატური რეაგირება, შესაბამისი ნაბიჯების გადადგმა იქნებოდა ის, რომ ეს მოსამართლეები თანამდებობას დატოვებდნენ. ამის ნაცვლად ვხედავთ, რომ პრემიერ - მინისტრი ამ ადამიანებს მხარდაჭერას უცხადებს. დღევანდელი ხელისუფლება რეალურად ამ კორუმპირებულ მოსამართლეებზე დგას", - განაცხადა თინა ბოკუჩავამ.