საგარეჯოს საკრებულოში „ლელოს“ წევრის, თაკო ყორღანაშვილის განცხადებით, კომპანია „მეტალ პლუსის“ დირექტორი, გიორგი მუზაშვილი ემუქრება და მის დაშინებას ცდილობს.

როგორც თაკო ყორღანაშვილი აცხადებს, მუზაშვილის მხრიდან მუქარის ზარი მას შემდეგ განხორციელდა, რაც მან „მეტალ პლიუსი“ მოგებული ტენდერების შეუსრულებლობაში, დარღვევებსა და ტენდერით მოთხოვნილის ნაცვლად იაფფასიანი რუსული ინვენტარით ჩანაცვლებაში დაადანაშაულა.

მისივე ინფორმაციით, საგარეჯოს საკრებულოში მან რამდენჯერმე დასვა საკითხი „მეტალ პლუსის“ შავ სიაში შეყვანის თაობაზე. თუმცა, მიუხედავად არსებული დარღვევებისა და გადაცდომებისა, ხელისუფლების მხრიდან აღნიშნულ ფაქტს რეაგირება არ მოჰყოლია და „მეტალ პლიუსი“ მხოლოდ საგარეჯოში, არსებული ინფორმაციით, 6-მდე პროექტს ახორციელებს, საქართველოს მასშტაბით კი, 12 მილიონზე მეტი ლარის ტენდერები აქვს მოგებული, მათ შორის არის 3 დაჩქარებული წესით.

„ლელოს“ მიერ გავრცელებული ინფორმაციით, ტენდერებს „მეტალპლიუსი“ 2021 წლიდან ახორციელებს საგარეჯოში და ვადების გასვლის მიუხედავად, არც ერთი არ შეუსრულებია.

„საგარეჯოს #1 საბავშვო ბაღის ეზოს მოწყობის პროექტი უნდა დასრულებულიყო ოქტომბერში, თუმცა ჯერ კიდევ არ დასრულებულა. პროექტის მიმდინარეობის დროს შეცვალეს პირობები და ხარისხიანი ატრაქციონები ჩაანაცვლეს უფრო იაფფასიანი რუსული საქანელებით. ასევე, კომპანია „მეტალ პლიუსს“ ევალებოდა საგარეჯოს სკვერის კეთილმოწყობა, თუმცა პროექტი ჯერ კიდევ დაუსრულებელია. დაუსრულებელია და არავინ იცის, როდის დასრულდება სოფელ კოდაში ტურისტული ცენტრის შენობის მშენებლობა. ეს პროექტიც, როგორც ყველა სხვა, რამდენჯერმე გადავადდა, მაგრამ დასრულებული ჯერ კიდევ არ არის“, - ნათქვამია პარტიის მიერ გავრცელებულ ინფორმაციაში.