ცრუ მოლოდინია, თითქოს ოლიგარქიის პირობებში შესაძლებელია მიიღო კანონი, რომელიც დეოლიგარქიზაციას მოახდენს, - ამის შესახებ ჟურნალისტებთან „სტრატეგია აღმაშენებლის“ დეპუტატმა პაატა მანჯგალაძემ განაცხადა.

მისი თქმით, ოპოზიციის კოლეგიალობიდან გამომდინარე, „ნაციონალური მოძრაობის“ პროექტს მხარს დაუჭერს, თუმცა, არ აქვს ილუზია, რომ ხელისუფლების ცვლილების გარეშე დეოლიგარქიზაცია შესაძლებელია.

„ვერავითარი დეოლიგარქიზაცია ვერ მოხდება ვიდრე „ქართული ოცნება" და ბიძინა ივანიშვილი ხელისუფლებაშია. ეს არის ცრუ მოლოდინის გაჩენა, რომ თითქოს ოლიგარქიის პირობებში შესაძლებელია ქვეყანაში მიიღო კანონი, რომელიც მოახდენს დეოლიგარქიზაციას. ოლიგარქია არ მიიღებს კანონს, რომელიც ოლიგარქის არსებობას შეეწინააღმდეგება ქვეყანაში. არცერთი მთავრობის წევრი არ გამოდის ისე, რომ ჯერ ღმერთივით ივანიშვილი არ ახსენოს და შემდეგ იწყებენ საუბარს. მე თუ არჩევანი მექნება „ქოცის" და "ნაციონალური მოძრაობის" ვერსიებს შორის, ოპოზიციის ვერსიას დავუჭერ კოლეგიალობიდან გამომდინარე მხარს, მაგრამ არ მაქვს ილუზია, რომ დეოლიგარქიზაცია ხელისუფლებიდან „ქართული ოცნების" ჩამოშორების გარეშე მოხდება,"- განაცხადა მანჯგალაძემ.

ცნობისთვის, პარლამენტის იურიდიულ საკითხთა კომიტეტი, დღევანდელ სხდომაზე, “დეოლიგარქიზაციის შესახებ“ კანონის პროექტის კორექტირებულ ვარიანტს განიხილავს.

დღეს გახდება ცნობილი, ვენეციის კომისიის რეკომენდაციების საფუძველზე როგორ შეიცვლება პროექტი და რა ცვლილებები აისახება მასში.

დღესვე, იურიდიულ საკითხთა კომიტეტი „ოლიგარქიული მმართველობის წინააღმდეგ” ფრაქცია „ნაციონალური მოძრაობის“ მიერ შეთავაზებულ პროექტზეც იმსჯელებს.