გიორგი ცაგარეიშვილი ოპოზიციაზე - 50 ადამიანი შესაძლოა არც სამშაბათის პლენარულ სხდომაზე აღმოჩნდეს - დასდევენ ერთმანეთს კარდაკარ, კურორტებზე ეძებენ, ათვალიერებენ "ფეისბუქებს", ემუდარებიან, რათა როგორმე შეიკრიბონ
როცა ოპოზიციის, მათ შორის საპარლამენტო ოპოზიციის სახე ლევან ხაბეიშვილია, შედეგი ყოველთვის ფატალური და გაუგონარი იქნება, სულ იქნება გაუგებრობა, ინფანტილიზმი და ჩავარდნილი საკითხები - ამიტომაც ჩაფლავდა პარლამენტში დროებითი საგამოძიებო კომისიის შექმნის საკითხი, - ამის შესახებ უმრავლესობის დეპუტატმა გიორგი ცაგარეიშვილმა ჟურნალისტებს განუცხადა.
ცაგარეიშვილის შეფასებით, ადამიანებმა ერთმანეთის გადათვლას, პლენარულ სხდომათა დარბაზში რამდენიმე წუთით გაძლებას ვერ მოაბეს თავი და ეს აღმოჩნდა დილემა ოპოზიციისთვის, რომელსაც ქვეყნის სათავეში უნდა მოსვლა.
"გამოჩნდა, რომ ამ ხალხს ელემენტარული არითმეტიკა და 50-მდე დათვლა არ სცოდნია. მათ ჩააფლავეს დროებითი საგამოძიებო კომისიის შექმნის საკითხი. ახლა იმაზეც დარდობენ, რომ 50 ადამიანი შესაძლოა არც სამშაბათის პლენარულ სხდომაზე აღმოჩნდეს. ამიტომ დასდევენ ერთმანეთს კარდაკარ, საზღვარგარეთ სხვადასხვა კურორტებზე ეძებენ ერთმანეთს, ათვალიერებენ "ფეისბუქებს", მათ ახლობლებს უკავშირდებიან, ემუდარებიან, ეხვეწებიან, რათა როგორმე შეიკრიბონ", - ასეთია დეპუტატ გიორგი ცაგარეიშვილის პოზიცია მოსამართლეებთან დაკავშირებით საგამოძიებო კომისიის შექმნაზე პარლამენტის რიგგარეშე სხდომის გადადების თაობაზე.
