თავდაცვის მინისტრის, ჯუანშერ ბურჭულაძის განცხადებით, ყოფილი ხელისუფლების მიერ იყო ორგანიზებულად სახელმწიფოს ძარცვა.

ის თავდაცვის ყოფილ მინისტრ დავით კეზერაშვილთან დაკავშირებით BBC-ის სტატიას გამოეხმაურა და აღნიშნა, რომ ქართველმა სამართალდამცავებმა პარტნიორ ქვეყნებთან მჭიდროდ ითანამშრომლეს.

„ყოფილი ხელისუფლების მიერ ეს იყო ორგანიზებულად სახელმწიფოს ძარცვა. ამ ძარცვით არ დასრულებულა ეს ისტორია. ისინი შემდეგ ძარცვავდნენ ჩვენი მეგობარი ქვეყნის პენსიონერებს და ეს ჩვენთვის ძალიან დასანანია. ჩვენ მაქსიმუმს გავაკეთებთ, რომ სამართალდამცავებს გვერდში დავუდგეთ. ეროვნულ დონეზე ჩვენმა სამართალდამცავებმა მჭიდროდ ითანამშრომლეს პარტნიორ ქვეყნებთან და საკმაოდ კარგი შედეგი ჰქონდათ გამოძიების თვალსაზრისით. გასარკვევია, სამართლებრივად როგორ გაგრძელდება საგამოძიებო მოქმედებები, ჩვენთან, სხვა ქვეყანაში თუ ერთობლივად“, - განაცხადა ჯუანშერ ბურჭულაძემ.