ვაღიარებ, რომ გამოწვევები გვაქვს. ამისთვის ვართ, რომ სწორად ვუპასუხოთ ამ გამოწვევებს, - ამის შესახებ განათლების და მეცნიერების მინისტრმა, გიორგი ამილახვარმა განაცხადა.

მისივე თქმით, უახლოეს მომავალში წარადგენენ გეგმას, თუ როგორ უპასუხონ გამოწვევებს.

" სამი კვირის განმავლობაში თითქმის ყველა საკითხს სიღრმისეულად ჩავუღრმავდით, ვაღიარებ, რომ გამოწვევები გვაქვს და სწორედ ამისთვის ვართ, რომ სწორად ვუპასუხოთ ამ გამოწვევებს. ვერ გამოვყოფდი სუსტ რგოლს, გვაქვს ძალიან ბევრი ძლიერი მხარე. ვიტყოდი, რომ გვაქვს გამოწვევები როგორც სასკოლო განათლებაში, ასევე სასკოლო, პროფესიულ და უმაღლეს განათლებაში, თუმცა ახლო მომავალში წარმოვადგენთ ზუსტს ხედვას, თუ როგორ უნდა ვუპასუხოთ ამ გამოწვევებს“, - აღნიშნავს მინისტრი.

მან უცხოელ სტუდენტებზეც ისაუბრა, რომელთაც საქართველოში სწავლა სურთ და აღნიშნა, რომ იმუშავებენ ისეთი სისტემის შექმნაზე, რომლითაც საქართველოში განათლებას მარტივი გზით მიიღებენ.

"ეს მრავალპროფილური საკითხია. ვფიქრობ, უახლოეს მომავალში გაფართოებულ ფორმატში გვექნება ამ საკითხის განხილვა. პროცედურული პრობლემები, პირველ ეტაპზე უნდა შემცირდეს, ისეთი სისტემა უნდა შევქმნათ, რომელიც უცხოელ სტუდენტებს იოლ წვდომას მისცემს ქართულ განათლებაზე" , - აღნიშნა მინისტრმა.