„ნაციონალური მოძრაობის“ წევრის თინა ბოკუჩავას განცხადებით, მიზანშეწონილი იქნება, სასამართლო სისტემაში კორუფციული და სხვა სახის სამართალდარღვევების შესწავლასთან დაკავშირებული საგამოძიებო კომისიის თავმჯდომარე იყოს ადამიანი, რომელსაც პარტიული კუთვნილება არ გააჩნია.

როგორც მან პარლამენტის პლენარულ სხდომაზე აღნიშნა, კომისიის მუშაობა დამოუკიდებელი უნდა იყოს.

„ბუნებრივია, ჩვენ მხარს ვუჭერთ აღნიშნულ კომისიას სრული შემადგენლობით. თავმჯდომარეობასთან დაკავშირებით მიგვაჩნია, რომ მიზანშეწონილი იქნება, ამ შემთხვევაში დეპუტატმა, რომელსაც არ გააჩნია პარტიული კუთვნილება, ასეთმა ადამიანმა უხელმძღვანელოს ამ კომისიას. ვფიქრობთ, ამ კომისიის დამოუკიდებელი მუშაობა და აღმოფხვრა იმისა, რომ არსებობდეს რაიმე სპეკულაციის შანსიც კი, ძალიან მნიშვნელოვანია იმისთვის, რომ საზოგადოებაში მაქსიმალურად ფართო სანდოობა ჰქონდეს. ვისურვებდი, თქვენც გესმოდეთ აღნიშნული საკითხი და ასე ხედავდეთ ამ კომისიის მნიშვნელობას“, -განაცხადა ბოკუჩავამ.

პარლამენტის პლენარულ სხდომაზე სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხს განიხილავენ.