სანდრო გირგვლიანის საქმის მოსამართლის, ლევან მურუსიძის და მისთანების დასაცავად მეორედ გამოუცხადა ბოიკოტი „ქართულმა ოცნებამ“ პარლამენტს, - ამის შესახებ პარტია „საქართველოსთვის“ წევრმა ანა ბუჩუკურმა განაცხადა.

მისი თქმით, როგორც ჩანს, "ქართულ ოცნებას" ბევრი რამ აქვს დასამალი სასამართლო სისტემაში.

„უმრავლესობამ უკვე მეორედ ბოიკოტი გამოუცხადა პარლამენტს - ტრაგიკომიკურ მდგომარეობაში ჩაიგდო უკვე მეორედ თავი ლევან მურუსიძის დასაცავად. დღეს "ქართული ოცნება" რასაც აკეთებს, ამას ჰქვია პარლამენტის საზედამხედველო ფუნქციის გაუქმება. ასეთი პრეცედენტი არ მახსენდება პარლამენტარიზმის ისტორიაში - მეორედ ზედიზედ ბოიკოტი გამოუცხადა უმრავლესობამ პარლამენტს. უკვე მეორედ გამოუტანეს საკუთარ თავს განაჩენი. ამაზე მეტი მტკიცებულება რა უნდა იყოს, ადასტურებენ, რომ ბევრი რამ აქვთ დასამალი სასამართლო სისტემაში", - განაცხადა ბუჩუკურმა.

სასამართლო სისტემაში კორუფციული და სხვა სახის სამართალდარღვევების შესწავლის მიზნით საგამოძიებო კომისიის შექმნის საკითხზე კენჭისყრა კვორუმის არარსებობის გამო დღესაც ვერ შედგა.

კენჭისყრის დაწყებამდე „ქართული ოცნების“ თავმჯდომარე ირაკლი კობახიძემ მოსამართლეებს სოლიდარობა კიდევ ერთხელ გამოუცხადა, რის კონტექსტშიც უმრავლესობის წევრმა დეპუტატებმა რეგისტრაცია ისევ არ გაიარეს.