პარლამენტის ვიცე-სპიკერის, არჩილ თალაკვაძის განცხადებით, საქართველოს სასამართლო სისტემა არის დიამეტრულად უფრო თავისუფალი და დამოუკიდებელი, ვიდრე მაშინ, როდესაც „ქართულმა ოცნებამ“ ხელისუფლება გადმოიბარა.

როგორც მან ჟურნალისტებს განუცხადა, ოპოზიციას აქვს მიზანი სასამართლოს დამოუკიდებლობას შეუტიოს და იმ მოსამართლეებზე იძიოს შური, რომლებმაც მათი ლიდერები გაასამართლეს.

„უნდა ითქვას, რომ სასამართლომ კიდევ ერთი სასარგებლო საქმე გააკეთა ამ ქვეყანაში - ოპოზიციამ, რომელიც საძებარი იყო, სხდომებზე არ დადიოდა, 8 თვე ბოიკოტში იყო, შემდეგ აცდენდა ყველა სხდომას, დებატებშიც არ მონაწილეობდა და „მინისტრის საათებსაც“ არ ესწრებოდა, როგორც იქნა დაიწყო პარლამენტში სიარული და სხდომებზე დასწრება. იმედია, 2024 წლის შემოდგომის ჩათვლით, ეს ოპოზიცია ასე ივლის სხდომებზე.

დღეს საქართველოს სასამართლო სისტემა არის დიამეტრულად უფრო თავისუფალი და დამოუკიდებელი, ვიდრე მაშინ, როდესაც ჩვენ გადმოვიბარეთ ხელისუფლება და ამას ამბობს არამხოლოდ მმართველი ძალა, არამედ ამაზე მეტყველებს ყველა სანდო მონაცემი, რომელიც სასამართლოს ეხება. ყველა მონაცემით ჩანს, რომ დღეს მოქალაქეები სასამართლოს მიიჩნევენ ბევრად უფრო თავისუფალ და სამართლიან სასამართლოდ, ვიდრე როდესაც ჩვენ გადმოვიბარეთ ხელისუფლება. სტრასბურგშიც არის იგივე მონაცემები. ჩვენ ვამბობთ და პირდაპირ ვეუბნებით ამ ოპოზიციას - მათი სურვილი არ არის არც დამოუკიდებელი და არც თავისუფალი სასამართლო, არც რაიმე ობიექტურის დადგენა, სინამდვილეში, მათ აქვთ სამი კონკრეტული ამოცანა: 1. ხელი შეუშალონ ევრორეკომენდაციების შესრულებას და საქართველოს კანდიდატის სტატუსის მიცემას, 2. სასამართლოში ჩარევა და როგორმე გავლენის დაბრუნება, სასამართლოს დამოუკიდებლობაზე შეტევა, 3. სასამართლოსა და მოსამართლეებზე შურისძიება, რომლებმაც გაასამართლეს მათი დამნაშავე პოლიტიკური ლიდერები. ეს არის კონკრეტული ამოცანები. რა თქმა უნდა, ჩვენ არ მივეცით შესაძლებლობა, რომ საქართველოს სასამართლოს გამოუთხარონ ძირი და მორიგი შეტევა განახორციელონ სასამართლო სისტემაზე“, - განაცხადა არჩილ თალაკვაძემ.