ჩვენ გავაკეთეთ მნიშვნელოვანი მობილიზაცია, მაგრამ თვითონ ბოიკოტში გავიდნენ და ჩასაფრებული იქნებიან, რომ ვინმე ავად გახდეს ან მივლინებაში წავიდეს,- ამის შესახებ ოპოზიციონერმა დეპუტატმა ხატია დეკანოიძემ ჟურნალისტებთან განაცხადა.

დეკანოიძე აცხადებს, რომ "ქართული ოცნება" "კლანს" მფარველობს და არ გამორიცხავს სანქციები პოლიტიკოსებზეც გავრცელდეს.

„სამწუხაროა, რომ ეს გადაწყვეტილება მიიღეს, თუმცა გასაგებია - ისინი არიან „კლანის" მფარველები, შეზრდილია „კლანი" და „ქართული ოცნება" და გასაგებია მათი დამოკიდებულება, რომ ნებისმიერ დროს, როცა იქნება კომისიის საკითხი გამოტანილი, ისინი აპირებენ ბოიკოტში წავიდნენ, ეს არის გამოაშკარავებული ფაქტი და არავითარი კითხვის ნიშანი არ დგას. ამიტომ, ალბათ, სანქციები გაიზრდება. კარგი იქნებოდა გამოგვეკვლია ის საკითხები, რომელიც წინა ხელისუფლების დროსაც გვაწუხებდა, ახლაც გვაწუხებს, მაგრამ ჩემთვის პრინციპში ეს საკითხი ამოიწურა, ისინი გააკეთებენ ყველაფერს, რომ გირგვლიანის მოსამართლე დაფარონ.

დიდი იმედი მაქვს ოპოზიციას ექნება ერთიანი პოზიცია, მაგრამ ჩემთვის ყველაფერი გასაგებია, ნებისმიერ დღეს როცა საკითხი დადგება, უმრავლესობის წევრები კვორუმს ჩააგდებენ და ეს არის ის, რაც რეალურად საზოგადოებას უნდა დაინახა. შეიძლება ვიღაც ავად გახდეს, მივლინებაში წავიდეს და ჩასაფრებული პოზიციით იქნებიან, ეს იქნება მათი პოზიცია. ვფიქრობ გასაგებია ყველაფერი და აღარც უნდა იყოს დიდი მოლოდინი იმაზე, რომ კომისიას შეიძლება მათ ერთ დღეს მხარი დაუჭირონ“, - განაცხადა დეკანოიძემ.