ოპოზიციის აზრი და მოქმედება კვლავ მიმართული იქნება საგამოძიებო კომისიის შექმნის მცდელობისკენ და „ქართული ოცნება“ ახდენს სახელმწიფო ინსტიტუციის ბოიკოტირებას, ავლენს არაქმედუნარიანობას და ეს დანაშაულებრივი კავშირი სასამართლო სისტემასთან სამართლებრივად უნდა შეფასდეს და მოჰყვეს პოლიტიკური გადაწყვეტილებები - „ქართული ოცნების“ პოლიტიკური ლიდერების სანქცირება, - ამის შესახებ „ნაციონალური მოძრაობის“ ერთ-ერთმა ლიდერმა ლევან ბეჟაშვილმა განაცხადა.

მისი თქმით, „ქართულ ოცნებას“ აქვს პირდაპირი პოლიტიკური გავლენა და პოლიტიკური მფარველობა სასამართლოს „კლანურ“ სისტემაზე.

„საზოგადოება მეორე დღეა აკვირდება პარლამენტის უსუსურობას და არაქმედუნარიანობას, როდესაც „ქართული ოცნება“ ბოიკოტს უცხადებს სახელმწიფო ინსტიტუციას. წარმოუდგენელი ფაქტია. კიდევ ერთხელ ადასტურებენ ეს ადამიანები, რომ „ქართულ ოცნებას“ აქვს პირდაპირი პოლიტიკური გავლენა და პოლიტიკური მფარველობა სასამართლოს კლანურ სისტემაზე. ამიტომ შემდეგი ნაბიჯი უნდა იყოს ჩვენს დასავლელ პარტნიორებთან ამ ყველაფრის წარდგენა მტკიცებულებების სახით და მოთხოვნა, რომ სასამართლო „კლანის“ პოლიტიკური მფარველების დასანქცირება მოხდეს. ცხადია, დღეს რომ რეჟიმმა თავი გააშიშვლა, ცხადი არის, რომ დანაშაულებრივი კავშირი „ქართული ოცნების“ ძალასთან და სასამართლოს „კლანურ“ სისტემასთან ერთმნიშვნელოვანია, რაც კენჭისყრის ბოიკოტირებით დადასტურდა. შემდეგი ნაბიჯი უნდა იყოს ამ პოლიტიკოსების დასანქცირება. ოპოზიციის აზრი და მოქმედება კვლავ მიმართული იქნება საგამოძიებო კომისიის შექმნის მცდელობისკენ და „ქართული ოცნება“ ახდენს სახელმწიფო ინსტიტუციის ბოიკოტირებას, ავლენს არაქმედუნარიანობას და ეს დანაშაულებრივი კავშირი სამართლებრივად უნდა შეფასდეს და მოჰყვეს პოლიტიკური გადაწყვეტილებები - „ქართული ოცნების“ პოლიტიკური ლიდერების სანქცირება“, - განაცხადა ბეჟაშვილმა.