შეშინებულმა უმრავლესობამ ინსტიტუციური ფუნქციური მნიშვნელობა ამ პარლამენტს წაართვა - ესაა არა მხოლოდ პარლამენტის საბოტაჟი, არამედ ჩვენი ქვეყნის ევროპული არჩევანის საბოტაჟი, - ამის შესახებ „ნაციონალური მოძრაობის“ დეპუტატმა თინა ბოკუჩავამ განაცხადა.

როგორც მან აღნიშნა, უმრავლესობამ გამოავლინა ის, რაც კომისიას უნდა დაედგინა.

"პარლამენტი მესამე დღეა პარალიზებულია, არამცთუ კომისიის საკითხი, არამედ ყველა სხვა კანონის კენჭისყრაც ვერ ტარდება, რადგან შეშინებული უმრავლესობა უნდა გადაეფაროს სასამართლო „კლანს“, რომლის სანქცირება მოხდა აშშ-ის მიერ. ეს უკვე ავლენს იმას, რისი დადგენაც კომისიას სურდა. ის, რომ ხელისუფლება კოორდინირებულია მოსამართლეებზე ხელის დაფარებით, ეს არის არა მხოლოდ პარლამენტის საბოტაჟი, მისი უფუნქციოდ დატოვება, არამედ ჩვენი ქვეყნის ევროპული არჩევანის საბოტაჟი, რადგან ინსტიტუციური ფუნქციური მნიშვნელობა ამ პარლამენტს შეშინებულმა უმრავლესობამ წაართვა, რომელიც მესამე დღეა საპარლამენტო პროცესებს გაურბის და რეგისტრაციაში არ იღებს მონაწილეობას", - განაცხადა ბოკუჩავამ.

ინფორმაციისთვის, სასამართლოსთან დაკავშირებით დროებითი საგამოძიებო კომისიის შექმნის საკითხი კენჭისყრაზე არც დღეს დადგა.

პარლამენტის პლენარულ სხდომაზე კენჭისყრის პროცედურის დასაწყებად საჭირო კვორუმი უკვე მესამედ არ შედგა, საპარლამენტო უმრავლესობამ კენჭისყრის წინ მოსამართლეების მიმართ სოლიდარობის ნიშნად რეგისტრაცია ამჯერადაც არ გაიარა.