კახა კალაძე ოპონენტებზე - ისე არიან დაბოღმილები, არ იციან რა თქვან - როგორ არ უნდა გესიამოვნოს ადამიანს, როცა ქალაქში მასშტაბური პროექტი მიმდინარეობს?
როგორ არ უნდა გესიამოვნოს ადამიანს ის, რომ ქალაქში ამ მასშტაბის პროექტი მიმდინარეობს? ისე არიან დაბოღმილები, არ იციან რა თქვან, როდესაც ქალაქისთვის რაიმე მნიშვნელოვანი კეთდება, - ამის შესახებ ქალაქის მერმა, კახა კალაძემ წერეთლის გამზირის რეაბილიტაციასთან დაკავშირებით განაცხადა, რითაც ოპონენტების კრიტიკას უპასუხა იმასთან დაკავშირებით, რომ სამუშაოების დაწყება ზაფხულის სეზონზე უმჯობესი იქნებოდა.
როგორც კალაძემ აღნიშნა, ოპოზიციონერების მხრიდან მსგავსი კომენტარი პოლიტიკური სპეკულაციაა.
„ოპონენტების მხრიდან პოლიტიკური სპეკულაციაა იმის თქმა, რომ სამუშაოები ამ დროის ნაცვლად, ზაფხულში უნდა დაგვეწყო, რადგან ქალაქში ნაკლები ხალხი იქნებოდა. ვთქვათ, ასე რომ მოვქცეულიყავით, სამუშაოები თებერვალსა და მარტშიც გადაიწევდა. მაშინ რას ვეტყოდით მოსახლეობას?
ისე არიან დაბოღმილები, არ იციან რა თქვან, როდესაც ქალაქისთვის რაიმე მნიშვნელოვანი პროექტი კეთდება. როგორ არ უნდა გესიამოვნოს ადამიანს ის, რომ ქალაქში ამ მასშტაბის პროექტი მიმდინარეობს?
მიწისქვეშა კომუნიკაციები იცვლება, ქუჩის ახალი დიზაინი გვექნება, როგორც ჭავჭავაძისა და მელიქიშვილის შემთხვევაში. ჩვენს ქალაქს სიახლეები სჭირდება“, - განაცხადა კალაძემ.
