ვხედავთ, რომ საგამოძიებო კომისიების სპონტანური ახალი ტალღა არის. 5 საგამოძიებო კომისია დააინიცირეს შარშან, სხვადასხვა დროს და ვერც ერთზე რაიმე არგუმენტი განხილვაზეც არ მოუტანიათ,- ამის შესახებ საქართველოს პარლამენტის თავმჯდომარემ შალვა პაპუაშვილმა განაცხადა.

აღნიშნულით ის პარტია „საქართველოსთვის“ ინიციატივას გამოეხმაურა საგამოძიებო კომისიის შექმნის თაობაზე, რომელიც საქართველოს ტერიტორიაზე ჩადენილ ე.წ. თაღლითური ქოლ-ცენტრების საქმეს შეისწავლის.

„ვხედავთ, რომ საგამოძიებო კომისიების სპონტანური ახალი ტალღა არის. 5 საგამოძიებო კომისია დააინიცირეს შარშან, სხვადასხვა დროს და ვერც ერთზე რაიმე არგუმენტი განხილვაზეც არ მოუტანიათ. ახლაც ეს პოლიტიკური თამაშის ნაწილია, რომლის მიზანია კონფრონტაცია, პოლარიზაცია და საქართველოს ევროპული პერსპექტივისთვის ხელის შეშლა. ნებისმიერი ასეთი იდეა სინამდვილეში მიზნად ისახავს საქართველოსთვის ევროპული პერსპექტივის გაუარესებას“,- აღნიშნა პაპუაშვილმა.

გარდა ამისა, მან საქართველოს თავდაცვის ყოფილ მინისტრზე დავით კეზერაშვილზეც ისაუბრა და აღნიშნა, რომ ქართველი ხალხის ინტერესების წინააღმდეგ მოქმედებს ნებისმიერი ის ქვეყანა, რომელიც დავით კეზერაშვილს იფარავს.

„თავი რომ დავანებოთ "ქოლ - ცენტრების" და BBC-ის რეპორტაჟს, მთავარია, რომ არსებობს განაჩენი დავით კეზერაშვილის წინააღმდეგ. მან 5 წელი უნდა მოიხადოს ქართულ ციხეში. ყოველი დღე, როდესაც მას აქვს მფარველობა და არ გადმოსცემენ საქართველოს, ეს არის ყოველი დღე, როდესაც ქართველი ხალხის ინტერესების წინააღმდეგ მოქმედებს ნებისმიერი ის ქვეყანა, რომელიც იფარავს დავით კეზერაშვილს. მთავარია, რომ მისი განაჩენი აღსრულდეს“,- აღნიშნავს პაპუაშვილი.