შალვა პაპუაშვილი ჩრდილოეთ მაკედონიის რესპუბლიკის ასამბლეის პრეზიდენტს შეხვდა
საქართველოს პარლამენტის თავმჯდომარე შალვა პაპუაშვილი ჩრდილოეთ მაკედონიის რესპუბლიკის ასამბლეის პრეზიდენტ ტალატ ჯაფერის შეხვდა. ინფორმაციას საქართველოს პარლამენტი ავრცელებს.
მათივე ცნობით, შალვა პაპუაშვილმა აღნიშნა, რომ ჩრდილოეთ მაკედონიის რესპუბლიკა საქართველოს სანდო პარტნიორია და ეუთოს თავმჯდომარის, ჩრდილოეთ მაკედონიის საგარეო საქმეთა მინისტრ ბუიარ ოსმანის საქართველოში ვიზიტი დადებითად შეაფასა.
„შალვა პაპუაშვილმა ტალატ ჯაფერის ევროკავშირში გაწევრიანების მოლაპარაკებების დაწყება მიულოცა და პროცესის წარმატებით წარმართვა უსურვა. მან, ასევე, ისაუბრა ევროკავშირის 12 რეკომენდაციის შესრულების საქართველოს პროგრესსა და მოლოდინებზე.
მხარეებმა ხაზი გაუსვეს საპარლამენტო დონეზე ერთმანეთის გამოცდილების გაზიარების მნიშვნელობას ორი ქვეყნის ევროინტეგრაციის ხელშესაწყობად, მათ შორის, მეგობრობის ჯგუფებსა და კომიტეტებს შორის.
საქართველოს პარლამენტის თავმჯდომარემ არსებულ გეოპოლიტიკურ ვითარებაში საქართველოს ჩრდილოატლანტიკურ ალიანსში გაწევრიანების მნიშვნელობაზე ისაუბრა და ამ პროცესში ჩრდილოეთ მაკედონიის მხარდაჭერის იმედი გამოთქვა.
ტალატ ჯაფერიმ აღნიშნა, რომ მზად არის, ევროკავშირში გაწევრიანების პროცესებთან დაკავშირებით, საქართველოს ჩრდილოეთ მაკედონიის გამოცდილება გაუზიაროს და საქართველოს ევროატლანტიკური მისწრაფებების მხარდაჭერა გააგრძელოს,“ - აღნიშნულია ინფორმაციაში.
