„ქოლ-ცენტრების“ საკითხი ხდება სპეკულირების საგანი „ქართული ოცნების“ მხრიდან - უმნიშვნელოვანესია, პარლამენტში შეიქმნას სივრცე, რომ საზოგადოებამ სიმართლე გაიგოს , - ამის შესახებ ჟურნალისტებთან "რესპუბლიკური პარტიის" თავმჯდომარე ხათუნა სამნიძემ განაცხადა, რითაც გამოეხმაურა პარტია „საქართველოსთვის“ ინიციატივას ე.წ ქოლცენტრების საქმეზე საგამოძიებო კომისიის შექმნის შესახებ.

მისივე თქმით, "ქართული ოცნების" სამართლიანი გამოძიების არავის სჯერა.

"საგამოძიებო კომისიის შექმნის აუცილებლობას ვხედავ საზოგადოების მაღალი ინტერესის გამო და იმის გამო, რომ ეს საკითხი ხდება სპეკულირების საგანი "ქართული ოცნების" მხრიდან. ამასთან, ძალიან კარგად ვიცით, რომ მათი განცხადებები, თითქოს პროკურატურა ამ საქმესთან დაკავშირებით თანამშრომლობს (საერთაშორისო გამოძიებასთან), არ შეესაბამება სიმართლეს და არ გვჯერა საზოგადოების დიდ ნაწილს, რომ "ქართული ოცნება" გამოიძიებს რაიმეს სამართლიანად, პოლიტიკური ინტერესების გარეშე. უმნიშვნელოვანესია, რომ პარლამენტში შეიქმნას სივრცე იმისთვის, რომ საზოგადოებამ სიმართლე გაიგოს", - განაცხადა სამნიძემ.

რაც შეეხება უკვე ინიცირებულ კომისიას სასამართლოსთან დაკავშირებით, სამნიძის თქმით, ოპოზიცია მაქსიმალურად მობილიზებულია.

"ქართული ოცნება" თავის მმართველობის 10 წლის შემდეგ კვლავაც ჩასაფრებულია, რომ ოპოზიციამ შეცდომა დაუშვას, ვინმე ავად გახდეს ან ვინმე არ დაესწროს სხდომას, მაგრამ ოპოზიცია მაქსიმალურად მობილიზებულია იმისთვის, რომ 50 ვიყოთ, როდემდე შევძლებთ ამ მობილიზებას, ან „ქართული ოცნება” როდემდე მიაყენებს შეურაცხყოფას საკუთარ ამომრჩეველს და საპარლამენტო მუშაობის პარალიზებას გააკეთებს, ამას გვიჩვენებს პროცესი, მე არ მინდა მოლოდინები ავწიო ისე, რომ საზოგადოებას მოლოდინი ჰქონდეს, რომ აუცილებლად შეიქმნება კომისია, თუმცა, ოპოზიცია გავაკეთებთ, რომ მიზანს მივაღწიოთ", - განაცხადა სამნიძემ.