მნიშვნელოვანია, თუ რით ჩავიდა ევროპაში ირაკლი ღარიბაშვილი - ევრორეკომენდაციების 12 პუნქტიდან მხოლოდ ორი მეტ-ნაკლებად შესრულებულია, დანარჩენი ათი კი ერთი წელია საწყის ეტაპზეა, - ამის შესახებ ჟურნალისტებს „სტრატეგია აღმაშენებლის“ დეპუტატმა პაატა მანჯგალაძემ განუცხადა.

მისივე თქმით, ევროპის ქალაქებში დაგეგმილი მაღალი დონის ვიზიტები ადასტურებს, რომ საქართველოს ევროკავშირსა და ნატო-ში ელიან, მაგრამ ამას წინ „ქართული ოცნება“ და ბიძინა ივანიშვილი ეღობება.

„ირაკლი ღარიბაშვილის ვიზიტით კიდევ ერთხელ დადასტურდა, რომ ევროპა, ნატო მხარს უჭერს არა რომელიმე ხელისუფლებას ან პარტიას, არამედ პირველ რიგში, საქართველოს და საქართველოს მოქალაქეების არჩევანს, რომელთაც სურთ საქართველო ევროპის და ნატო-ს სრულფასოვანი წევრი გახდეს. ეს ყველაფერი ჩვენი უსაფრთხოებისა და მიმავლისთვის ხდება. კანდიდატის სტატუსის მინიჭება მხოლოდ ტექნიკურად არ ხდება. ეს პოლიტიკური გადაწყვეტილებაა და ევროპა საქართველოსგან ამ პოლიტიკური გადაწყვეტილების მიღებისთვის შანსის მიცემას ელოდება. ამას „ქართული ოცნება“ ეღობება. უფრო მეტიც - შექმნეს დავალებათა დივერსიული ჯგუფი, რომელსაც ევროპის მხილება და ევროპისგან ომის საფრთხეზე ხალხის გაფრთხილება უნდა დაეწყო. ამ პროპაგანდამ არ იმუშავა - ქვეყნის მოსახლეობის 90% ევროინტეგრაციას უჭერს მხარს. ღარიბაშვილი ევროპაში ჩავიდა არა როგორც საქართველოს, არამედ როგორც ბიძინა ივანიშვილის წარმომადგენელი - ის იქ ქართველი ხალხის ნებას არ ახმოვანებს“, - განაცხადა პაატა მანჯგალაძემ.