IRI-ის კვლევებიდან ჩანს, რომ საჭიროა ერთიანობა - „ნაციონალური მოძრაობა“ მზად არის ითანამშრომლოს ყველასთან, რათა ამ ქვეყნის მთავარი დაბრკოლება - „ქართული ოცნება“ ხელისუფლებიდან გავუშვათ, - ამის შესახებ ფრაქცია „ერთიანი ნაციონალური მოძრაობის“ დეპუტატმა, დავით კირკიტაძემ განაცხადა.

მისივე თქმით, გადამწყვეტი მნიშვნელობა ექნება, თუ ვინ როგორ გაანალიზებს IRI-ის კვლევებს და სწორ დასკვნას გამოიტანს თუ არა.

„IRI-ის კვლევის შედეგების ხილვა ძალიან მნიშვნელოვანი იყო, ასევე გადამწყვეტი მნიშვნელობა ექნება, ვინ როგორ გაანალიზებს აღნიშნულ კვლევებს და გამოიტანს თუ არა სწორ დასკვნას. „ნაციონალური მოძრაობა“ მზად არის ქვეყნის ეროვნული ინტერესი პარტიულ ინტერესზე მაღლა დააყენოს, ყველა ნაბიჯი გადადგას, რომელიც არის საჭირო, მათ შორის, მჭიდრო ურთიერთობა ოპოზიციურ პარტიებთან. ეს იქნება კოალიციის შექმნა, არჩევნებამდე თუ არჩევნების შემდეგ და „ქართული ოცნება“, ამ ქვეყნის მთავარი წინაღობა ევროინტეგრაციისთვის ხელისუფლებიდან გავუშვათ,“ - განაცხადა დავით კირკიტაძემ.