ადამიანი რომ არ იკვებება, ყველასთვის შეშფოთების საგანია. ნუ გგონიათ, რომ მარტო ხაბეიშვილისთვის არის. იმედი მაქვს, მშობლებისთვისაც გახდება რეალური შეშფოთების საგანი, - ამის შესახებ ჟურნალისტებთან უმრავლესობის წევრმა ირაკლი ქადაგიშვილმა, საქართველოს ყოფილი პრეზიდენტის, მიხეილ სააკაშვილის ჯანმრთელობის მდგომარეობასთან დაკავშირებით განაცხადა.

ქადაგიშვილი გამოეხმაურა პოლონეთის საგარეო საქმეთა მინისტრის განცხადებას და აღნიშნა, რომ არავის აქვს პრობლემა სააკაშვილთან დაკავშირებით კითხვებს უპასუხოს, რადგან მისი უფლებები დაცულია და ყველა სერვისი მიეწოდება.

მისივე თქმით, თავად პაციენტის პასუხისმგებლობაა, თუ ის საკვებს არ იღებს.

"ზოგადად, შეშფოთების საგანი არის ყველასთვის, არა მარტო პოლონეთის საგარეო საქმეთა მინისტრისთვის, ჩემთვისაც როგორც ერთი მოქალაქისთვის შეშფოთების საგანია, რომ ადამიანი არ იკვებება. ეს ყველასთვის შეშფოთების საგანია. ნუ გგონიათ, რომ მარტო ხაბეიშვილისთვის არის. იმედი მაქვს, როცა მშობლებისთვისაც გახდება რეალური შეშფოთების საგანი, მიუტანენ იმ საკვებს, რაც კალორიულად ოდნავ მეტი იქნება, რომ ადამიანი ნორმალურ კონდიციაში დაბრუნდეს," - განაცხადა ქადაგიშვილმა.

პოლონეთის საგარეო საქმეთა მინისტრის ზბიგნევ რაუს განცხადებით, საქართველოს საგარეო საქმეთა მინისტრ, ილია დარჩიაშვილთან შეხვედრაზე მიხეილ სააკაშვილის საკითხი განიხილეს.