ირაკლი კობახიძის შეფასებით, საქართველოსთვის ევროკავშირის წევრობის კანდიდატის სტატუსის მიღების შანსი 50/50-ზეა
„ქართული ოცნების“ თავმჯდომარე ირაკლი კობახიძე დეკემბერში საქართველოს მიერ ევროკავშირის წევრობის კანდიდატის სტატუსის მიღების შანსებს 50/50-ზე აფასებს და აცხადებს, რომ ეს პოლიტიკური გადაწყვეტილებაა.
ამის შესახებ კობახიძემ მმართველის პარტიის ოფისში გამართულ ბრიფინგზე ისაუბრა, სადაც აღნიშნა, რომ კანდიდატის სტატუსთან დაკავშირებით ფაქტებსა და მტკიცებულებებზე დაფუძნებული გადაწყვეტილების მიღება რომ ხდებოდეს, საქართველოს კანდიდატის სტატუსი 100%-ით გარანტირებული ექნებოდა.
„გამომდინარე იქიდან, რომ ეს არის სუფთა პოლიტიკური გადაწყვეტილება, შანსები არის 50/50-ზე. ეს რომ იყოს გარკვეულ მტკიცებულებებზე, ფაქტებზე დაფუძნებული, თავისი არსით ტექნიკური გადაწყვეტილება, ამ შემთხვევაში ჩვენ გვექნებოდა იმის 100%-იანი გარანტია, რომ მივიღებდით კანდიდატის სტატუსს. თუმცა, ეს არის პოლიტიკური გადაწყვეტილება, შესაბამისად, შანსები არის 50/50-ზე. ბევრ ფაქტორზე იქნება ეს ყველაფერი დამოკიდებული, მათ შორის, რეგიონში არსებულ ვითარებაზე, უკრაინაში არსებულ ვითარებაზე. ვნახოთ როგორი იქნება ვითარება დეკემბრისთვის და ამის მიხედვით მიიღებს, ალბათ, ევროპული საბჭო გადაწყვეტილებას“, - განაცხადა კობახიძემ.
v-if="article.gallery" v-html="article.gallery"
