ბაჩო დოლიძე - ბოლომდე უნდა ვიბრძოლოთ, რომ ყველა ის ადამიანი, რომელიც „რუსულ კანონს" ებრძოდა, გარეთ იყოს - არ უნდა დავუშვათ, რომ თუნდაც ერთი ადამიანი ჩავუტოვეთ რეჟიმს სადამსჯელო ოპერაციის სახით
ბოლომდე უნდა ვიბრძოლოთ იმისათვის, რომ ყველა ის ადამიანი, რომელიც "რუსულ კანონს" ებრძოდა, გარეთ იყოს, - ამის შესახებ „ერთიანი ნაციონალური მოძრაობის“ ერთ-ერთმა ლიდერმა, ბაჩო დოლიძემ თბილისის საქალაქო სასამართლოსთან განაცხადა, სადაც მარტის აქციების დროს დაკავებული ლაზარე გრიგორიადისის მხარდამჭერი აქცია მიმდინარეობს.
მოლოდინთან დაკავშირებით დასმულ კითხვაზე, ბაჩო დოლიძე აღნიშნავს, რომ მოსამართლე ლაზარე გრიგორიადისის საქმესთან დაკავშირებით, ცალსახად პოლიტიკურ გადაწყვეტილებას მიიღებს.
„არც ერთ შემთხვევაში არ შეიძლება არც ერთი ადამიანის ჩატოვება ამ რეჟიმისთვის, იმიტომ, რომ ეს ადამიანები ებრძოდნენ რეჟიმს, "რუსულ კანონს". მარტის მოვლენების პერიოდში უამრავი ადამიანი დაზარალდა, თვალები დათხარეს და არც ერთი სამართალდამცველი პასუხისგებაში მიცემულია არ არის. შესაბამისად, პრეცედენტი იქნება ჩვენ თუ დავუშვით ის, რომ თუნდაც ერთი ადამიანი ჩავუტოვეთ რეჟიმს სადამსჯელო ოპერაციის სახით, ეს იქნება, რა თქმა უნდა, ძალიან ცუდი. ასე რომ ბოლომდე უნდა ვიბრძოლოთ იმისათვის, რომ ყველა ის ადამიანი, რომელიც "რუსულ კანონს" ებრძოდა, იყოს გარეთ,“ - განაცხადა დოლიძემ.
