დარწმუნებული ვართ იმაში, რომ [სანქციებთან შეერთებით] რუსეთს დავაზიანებთ? პირიქით, საკუთარ თავს დავიზიანებთ და ეს საკუთარი თავის ჰარაკირი იქნებოდა, - ამის შესახებ „ქართული ოცნების“ გენერალურმა მდივანმა, თბილისის მერმა, კახა კალაძემ განაცხადა.

მისივე თქმით, იმ შემთხვევაში, თუ საქართველო რუსეთის წინააღმდეგ დაწესებული სანქციებს შეუერთდებოდა, საქართველო დაზიანდებოდა და არა რუსეთი.

„ჩვენ აბსოლუტურად ღიად განვაცხადეთ, რომ არ ვუერთდებით სანქციებს და რატომ იყო ეს გადაწყვეტილება მიღებული? იმიტომ, რომ არ გვინდოდა დაგვეზიანებინა ჩვენი ქვეყანა, საკუთარი ხალხი, ჩვენი ქვეყნის მოსახლეობა. როგორ შეიძლება ჩვენ შევუერთდეთ სანქციებს და დარწმუნებული ვართ იმაში, რომ ამით რუსეთს დავაზიანებთ? პირიქით, საკუთარ თავს დავიზიანებთ და ეს საკუთარი თავის ჰარაკირი იქნებოდა. იგივეა მეორე ფრონტის გახსნასთან დაკავშირებით. ჩვენ ხომ გამოვიარეთ ეს ყველაფერი. ჩვენ ხომ გადავიხადეთ საფასური. ხომ ვიცით, რამხელა უბედურება მოაქვს ომს, რამხელა ზიანი მოგვაყენა 2008 წელმა. ამიტომ დღეს ყველაზე მთავარი და მნიშვნელოვანი არის მშვიდობა, სტაბილურობა, ეკონომიკური განვითარება“, - განაცხადა კახა კალაძემ.