„ერთიანი ნაციონალური მოძრაობის“ განცხადებით, ე.წ თაღლითური "ქოლ - ცენტრები" იღებენ მითითებებს სახელმწიფო უსაფრთხოების სამსახურისგან, რომ სასწრაფოდ შეიცვალონ მისამართები.

ამ საკითხზე „ნაციონალური მოძრაობის“ თბილისის ორგანიზაციის ოფისში პარტიის წევრებმა - ვასო ურუშაძემ და ლაშა ტყეშელაძემ ბრიფინგი გამართეს. ისინი ტრანსნაციონალური დანაშაულის, ე.წ თაღლითური "ქოლ - ცენტრების" მფარველების გამოაშკარავებას და დაკავებას ითხოვენ.

„ჩვენი ინფორმაციით, ამ წუთებში ბიძინა ივანიშვილის ოლიგარქიული კლანი და გრიგოლ ლილუაშვილის დაჯგუფება სახელმწიფო უსაფრთხოების სამსახურში დაკავებულია ტრანსნაციონალური დანაშაულის გადამალვით. კერძოდ, ე.წ "ქოლ - ცენტრები" იღებენ მითითებებს, რომ სასწრაფოდ შეიცვალონ მისამართები და გადავიდნენ მრავალსართულიან შენობებში, სადაც არის მაღალი დაცულობა, ესენი შეიძლება იყოს საცხოვრებელი ან ე.წ ბიზნესცენტრები. მათ აქვთ ინფორმაცია, რომ ჩვენ „ანტიკორუფციული მოძრაობა“ საგამოძიებო ჟურნალისტური ჯგუფები ვფლობთ არაერთ მისამართს, სადაც არის განთავსებული ე.წ თაღლითური ქოლცენტრი და მათ ეშინიათ, ეშინიათ ჩვენი მოქმედებების, ჩვენი დამოუკიდებელი საგამოძიებო ჟურნალისტური პროცესების, ეშინიათ პარლამენტში მიმდინარე მოვლენების, სადაც საუბარია საგამოძიებო კომისიის შექმნაზე. მათ ეშინიათ საერთაშორისო საგამოძიებო ჯგუფების, რომლებიც სავარაუდოდ კვლავ იმყოფებიან საქართველოში და ცდილობენ მაქსიმალურად გადამალონ ეს დანაშაული, თუმცა ჩვენ გავიგებთ ყველა იმ მისამართს, რომელ მისამართზეც იქნება გადასული ე.წ თაღლითური ქოლცენტრები, ვამხელთ მათ მფარველებს. ქვეყანა, რომელსაც მიზნად აქვს დასახული ევროკავშირში ინტეგრაცია, წარმოუდგენელია ამავდროულად იყოს ტრანსნაციონალური დანაშაულის ცენტრი. მფარველობის გარეშე ამ დანაშაულის არსებობა არის წარმოუდგენელი“, - განაცხადა ვასო ურუშაძემ.

როგორც მან აღნიშნა, მიუხედავად პროკურატურისთვის წერილობით მიმართვისა, არც ერთხელ გამოძიება არ დაწყებულა. მისივე თქმით, აუცილებელია პარლამენტში შეიქმნას საგამოძიებო კომისია, რომელიც გამოააშკარავებს ე.წ თაღლითური "ქოლ - ცენტრების" მფარველებს.

„მნიშვნელოვანია საპარლამენტო კომისიის შექმნა და პირველ რიგში მფარველების იდენტიფიცირება და მათი დასჯა. ჩვენ ერთ წელზე მეტია დაკავებულები ვართ საქართველოში ტრანსნაციონალური დანაშაულის მხილებით, ვიყავით არაერთ მისამართზე, მოხდა იდენტიფიცირება ე.წ თაღლითური ქოლცენტრის, თუმცა მიუხედავად იმისა, რომ წერილობითაც მივმართავდით პროკურატურას დაწყებულიყო გამოძიება მფარველობის ნაწილში, არც ერთხელ საქართველოს პროკურატურამ ეს გამოძიება არ დაიწყო და ჩვენი მოქმედებები დარჩა რეაგირების გარეშე. აქედან გამომდინარე, მნიშვნელოვანია პარლამენტში შეიქმნას ე.წ საგამოძიებო კომისია, რომელიც ამხელს მფარველებს და საქართველოში აღიკვეთება ტრანსნაციონალური დანაშაული“, - განაცხადა ვასო ურუშაძემ.

ლაშა ტყეშელაძის განცხადებით კი, პროკურატურამ დაიჭირა მხოლოდ დაბალი რგოლის წარმომადგენლები, რომლებიც გირაოთი გაათავისუფლეს, მფარველები კი ისევ არ არიან გამოვლენილები.

„აღნიშნული დანაშაული არის უმძიმესი ტრანსნაციონალური დანაშაული. აუცილებელია გამოვლენილი იქნან მფარველები. დღეს პროკურატურა გამოდის და ამაყობს, რომ თითქოს ვიღაცები დააკავა, თუმცა ეს ადამიანები არიან ყველაზე დაბალი რგოლი, რომელიც გამოშვებულები არიან გირაოთი და გაუფორმეს საპროცესო ხელშეკრულება. ჩვენ მოვითხოვთ და აუცილებელია დაკავებულები და გამოვლენილები იყვნენ მფარველები. ჩვენ სხვადასხვა საერთაშორისო ორგანიზაციებს გადავცემთ არსებულ ყველა დოკუმენტს. ქედან გამომდინარე, აუცილებელია დაკავებული და გამოვლენილი იყოს ყველა მფარველი“, - განაცხადა ლაშა ტყეშელაძემ.