პარლამენტის იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, სასამართლოს რეფორმირების ფარგლებში მმართველი გუნდი მხარს არ დაუჭერს საკითხებს, რაც თავის მხრივ, კონსტიტუციის გადახედვას იწვევს.
როგორც ოხანაშვილმა ამ კონტექსტში პარლამენტის იურიდიულ საკითხთა კომიტეტის სხდომაზე აღნიშნა, საკონსტიტუციო რეფორმასთან დაკავშირებით ვენეციის კომისიამ წარმოადგინა დადებითი დასკვნა, მათ შორის მართლმსაჯულების ნაწილში. ოხანაშვილის თქმით, გაუგებარია, თუ რატომ შეიძლება ამ მხრივ საკითხი გადაიხედოს.
„ნებისმიერი საკითხი, რაც თავის მხრივ, საკონსტიტუციო ცვლილებებს უკავშირდება, ჩვენი მხრიდან მხარდაჭერილი არ იქნება და ვერ იქნება. საკონსტიტუციო რეფორმა 2018 წელს ჩატარდა. ის მოწონებულ იქნა ვენეციის კომისიის მხრიდან, მათ შორის სასამართლოს ნაწილში და მათ შორის იუსტიციის უმაღლესი საბჭოს იმ ფირმითა და კომპოზიციით დარეგულირებასთან დაკავშირებით, როგორც დღეს არის.
კონსტიტუციის სტაბილურობა არის ერთ-ერთი მნიშვნელოვანი კომპონენტი.
ჩვენ ისეთ საკითხებს მხარს არ დავუჭერთ, რომელიც შესაძლოა, საკონსტიტუციო ცვლილებებს უკავშირდებოდეს“, - განაცხადა ანრი ოხანაშვილმა.
„საერთო სასამართლოების შესახებ“ ორგანულ კანონში დაგეგმილი ცვლილებების პროექტს, რომელიც სასამართლო რეფორმის სამუშაო ჯგუფმა ევროკავშირის 12 რეკომენდაციის ფარგლებში მოამზადა, იურიდიულ საკითხთა კომიტეტი პირველი მოსმენით იხილავს.