პარლამენტმა პლენარულ სხდომაზე ცესკოს წევრობისა და ცესკოს თავმჯდომარეობის კანდიდატების შერჩევის, მათი პარლამენტისთვის წარდგენისა და არჩევის წესში დაგეგმილ ცვლილებები განიხილა.

განხილვა დაახლოებით 3-წუთამდე გაგრძელდა, რა დროშიც მომხსენებელმა, “ქართული ოცნების“ დეპუტატმა გივი მიქანაძემ კანონის პროექტების პრინციპებზე ისაუბრა. მასთან შეკითხვები არ ყოფილა, არ გამართულა სიტყვით გამოსვლები. განხილვაში ოპიზიცია არ მონაწილეობდა.

„საარჩევნო კოდექსსა“ და რეგლამენტში შესატანი ცვლილებების პროექტები პარლამენტს პირველი მოსმენით წარედგინა.

კანონპროექტის თანახმად, ცესკოს თავმჯდომარისა და წევრების შესარჩევ კონკურსს გამოაცხადებს და საკონკურსო კომისიას შექმნის პარლამენტის თავმჯდომარე. კომისიის შემადგენლობაში ცხრა წევრი იქნება და ის პრეზიდენტის ერთი წარმომადგენელის, სამოქალაქო სექტორისა და აკადემიური წრეების რვა წარმომადგენლისგან დაკომპლექტდება.

ცვლილებების მიხედვით, ცესკოს თავმჯდომარისა და ცესკოს წევრების კანდიდატურებს პარლამენტს, პარლამენტის თავმჯდომარე წარუდგენს. ამავდროულად, გათვალისწინებულია პრეზიდენტის მონაწილეობა ცესკოს თავმჯდომარეობისა და ცესკოს წევრობის კანდიდატურების წარდგენის პროცესში, თუკი პარლამენტი პირველივე ჯერზე ვაკანტურ თანამდებობებზე პირთა არჩევას ვერ შესძლებს.

ცესკოს თავმჯდომარისა და ცესკოს წევრები პარლამენტის სრული შემადგენლობის უმრავლესობით, 5 წლის ვადით აირჩევიან.

კანონპროექტის ინიციატორები არიან პარლამენტის წევრები: - მამუკა მდინარაძე, გივი მიქანაძე, დავით მათიკაშვილი, რატი იონათამიშვილი და ირაკლი შატაკიშვილი.