საკრებულოს მიერ სპეცტექნიკისთვის (ნაგამზიდისთვის) დამტკიცებული თანხა, ნაცვლად იმისა, რომ ქალაქის დასუფთავებას მოხმარებოდა, ბათუმის მერის პირად კომფორტში დაიხარჯა, - ამის შესახებ „ერთიანი ნაციონალური მოძრაობის“ წევრმა, ალექსანდრე ვარშალომიძემ განაცხადა.
ვარშალომიძე ბათუმის მერს, არჩილ ჩიქოვანს კითხვით მიმართავს, „თუ სად არის მისი ძველი ავტომობილი.“
„საკრებულოს ერთ-ერთ სხდომაზე 200 000 ლარის მოთხოვნით შემოვიდა სანდასუფთავება, საკრებულომ ეს თანხა გამოუყო, როგორც სპეცტექნიკის საყიდლად, მაგრამ ეს მანქანა, რაც ჩვენ გაჩვენეთ არის მხოლოდ და მხოლოდ შეძენილი ფუფუნებისთვის. სირცხვილია, როდესაც მერი არ იკვლევს ფუფუნების საკითხს და ასე მინდა მივმართო ბატონ არჩილს, თუ სად არის მისი ძველი ავტომობილი,“ - განაცხადა „ერთიანი ნაციონალური მოძრაობის“ წევრმა, ალექსანდრე ვარშალომიძემ.
„ერთიანი ნაციონალური მოძრაობის“ კიდევ ერთი წევრის, ლაშა ადამიას თქმით, შპს სანდასუფთავებამ ორი ძვირადღირებული ავტომობილი ( kia sorento და kia k5) 203 800 ლარად შეიძინა.
„ბათუმის მერიამ კერძოდ, შპს სანდასუფთავებამ ორი ძვირადღირებული ავტომობილი ( kia sorento და kia k5) 203 800 ლარად შეიძინა. აქ გვაქვს ტენდერის შესყიდვის, ჩაბარების დოკუმენტაცია, რომ ეს მანქანები მან ნამდვილად ჩაიბარა. ეს იმას ნიშნავს, რომ ამ ფასიანი მანქანით ან არჩევნები გადააქვთ ან კიდევ სხვა მიზნებისთვის შეიძინეს,“ - განაცხადა „ერთიანი ნაციონალური მოძრაობის“ წევრმა, ლაშა ადამიამ.
აღნიშნულ ინფორმაციას „ნაციონალური მოძრაობის“ პრესსამსახური ავრცელებს.