პრეზიდენტი - ვდგავარ მათ გვერდით, ვინც გუშინ სოხუმში, აფხაზეთში აქციას მართავდა ბანერებით: „აფხაზეთი არ იყიდება“, „ჩვენ არ დავუთმობთ რუსებს“
მე ვდგავარ მათ გვერდით, ვინც გუშინ სოხუმში, აფხაზეთში აქციას მართავდა ბანერებით „აფხაზეთი არ იყიდება“, „ჩვენ არ დავუთმობთ რუსებს“, - ამ სიტყვებით დაასრულა საქართველოს პრეზიდენტმა სალომე ზურაბიშვილმა ბრიუსელში, ევროპარლამენტში საკუთარი სიტყვით გამოსვლა, რასაც ევროპარლამენტარების მხრიდან აპლოდისმენტები და ფეხზე წამოდგომა მოჰყვა.
პრეზიდენტის თქმით, როდესაც ის ევროდეპუტატებს საქართველოს ევროპული მომავლისთვის მიმართავს, ის მათ ასევე მიმართავს აფხაზეთისა და ცხინვალის რეგიონის მოსახლეობისთვისაც.
„როდესაც მე თქვენ მოგმართავთ საქართველოს ევროპული მომავლისთვის, მე აგრეთვე მოგმართავთ აფხაზეთისა და ცხინვალის რეგიონის მოსახლეობისთვისაც, რადგან ეს მომავალი მათთვისაც, ერთადერთია, რომელიც მათ თავისუფლებას, დაცვასა და იდენტობას უზრუნველყოფს“, - აღნიშნა ზურაბიშვილმა.
