მგონია, რომ პრეზიდენტი მზად არის გვარამიას შეწყალებისთვის, თუმცა, ალბათ, ორი ფაქტორია, რაც მისთვის მნიშვნელოვანია: როდის, რა ვითარებაში, რომ გარდა ჰუმანური აქტისა, ამან პოლიტიკური შედეგი მოუტანოს ქვეყანას და მეორე - არიან ადამიანები, რომელსაც რაც მეტს შეუძახებ, ცოტას გააკეთებს, - ამის შესახებ "ლელოს" დეპუტატმა დავით უსუფაშვილმა განაცხადა.

საერთო ჯამში, უსუფაშვილი მიიჩნევს, რომ პრეზიდენტს ევროპარლამენტში სწორი აქცენტები ჰქონდა.

"პრეზიდენტის გამოსვლა ბრიუსელში იყო წინ გადადგმული ნაბიჯი ქვეყნის ევროინტეგრაციის გზაზე, რასაც ვერ ვიტყვი პრემიერ-მინისტრის მიერ ევროპის სხვა დედაქალაქებში გაკეთებულ განცხადებებზე.

პრეზიდენტი შეეცადა ევროპელებისთვის დაენახებინა ის საქართველო, რაც სინამდვილეშია. ანუ ევროპული არჩევანის მქონე საქართველო, ევროპული ღირებულებების გამზიარებელი ქართველი ხალხი. აღმოჩნდება თუ არა ეს გამოსვლა საკმარისი იმის საკომპენსაციოდ, რაც ხელისუფლებამ არ გააკეთა, ან ცუდად გააკეთა, დაწყებული შარლ მიშელის შეთანხმების გადაგდებით, დღემდე ბევრი ისეთი ქმედების ჩადენით, რამაც სერიოზული პრობლემა შეუქმნა ქვეყნის ევროპულ მომავალს...შარშან ამ დღეს მიშელის შეთანხმების ფარგლებში რომ ვყოფილიყავით და შეთანხმების ფარგლებში წასულიყო პროცესები, მივიღებდით შარშანვე სტატუსს. მან რაზეც ისაუბრა, ეს იყო სწორი თემები, ყველას თავის გემოვნება და მოსაზრება აქვს, უნდა გავითვალისწინოთ, სად გამოდის. მე არ მგონია, რომ ამაზე მეტი კონკრეტიკა შეეძლო, სულ ერთი კვირის წინ გაცილებით მწვავე იყო ხელისუფლების მიმართ. ბრიუსელის ტრიბუნა არ იყო ის ტრიბუნა, სადაც პრეზიდენტს შიდა პოლიტიკური პროცესები უფრო დეტალურად უნდა გაერჩია.

მე ჩემს პირად დაკვირვებას მოგახსენებთ: მგონია, რომ (არანაირი ინფორმაცია არ მაქვს, ჩემი დაკვირვების შედეგს გეუბნებით) პრეზიდენტი მზად არის, ნიკა გვარამიას შეწყალებისთვის, თუმცა, ალბათ, ორი ფაქტორია, რაც მისთვის მნიშვნელოვანია. ერთი, როდის და რა ვითარებაში, რომ გარდა ჰუმანური აქტისა, ამან პოლიტიკური შედეგი მოუტანოს ქვეყანას და მეორე, ალბათ, ისიც უნდა გავითვალისწინოთ, რომ არიან ადამიანები, რომელთაც, რაც მეტს შეუძახებ, მეტს გააკეთებს და არიან ადამიანები, რომელსაც რაც მეტს შეუძახებ, ცოტას გააკეთებს, ალბათ, ესეც უნდა გავითვალისწინოთ", - განაცხადა უსუფაშვილმა.