რუსთაველის გამზირზე, პარლამენტის წინ მიმდინარე საპროტესტო აქციის ძირითადი ნაწილი დასრულდა.
საკანონმდებლო ორგანოს უკანა შესასვლელთან რჩება მარტის აქციებისას დაკავებულ ლაზარე გრიგორიადისის მამა, ბექა გრიგორიადისი, რომელსაც კარავი აქვს გაშლილი.
რამდენიმედღიანი მცდელობის შემდეგ, ბექა გრიგორიადისს დღეს პარლამენტთან კარვის გაშლის უფლება მისცეს. აღნიშნულამდე, საკანონმდებლო ორგანოსთან სამოქალაქო აქტივისტები, პოლიტიკოსები და არასამთავრობო ორგანიზაციების წარმომადგენლები იყვნენ შეკრებილები.
აქციის მონაწილეები 2 ივნისს, პარლამენტთან მიმდინარე აქციაზე ახალგაზრდების დაკავებას აპროტესტებდნენ. მათ სიმბოლურად ხელში თეთრი ფურცლები ეჭირათ და აცხადებდნენ, რომ პროტესტის გამოხატვა დანაშაული არ არის.
ცნობისთვის, გუშინ, 2 ივნისს, პარლამენტის შენობის წინ მიმდინარე ადმინისტრაციული წესით 7 პირი დააკავეს, მათი სასამართლო პროცესები სავარაუდოდ, ხვალ გაიმართება. პარლამენტთან დააკავეს ასევე, ადვოკატი შოთა თუთბერიძე, ის მოგვიანებით, ხელწერილის საფუძველზე გაათავისუფლეს.