რუსეთთან მიმართებაში მხოლოდ იმაზეა საუბარი, რომ ომი არ გვაქვს საქართველოში - ეს არ არის გამოსავალი. შესაძლოა, ქვეყანა განადგურდეს ომის გარეშეც, - ამის შესახებ ოპოზიციონერმა პოლიტიკოსმა თამარ კორძაიამ რუსეთიდან მომდინარე ჰიბრიდულ საფრთხეებთან დაკავშირებით, ჟურნალისტებთან განაცხადა.

მისივე თქმით, ძალიან დიდი ხანია ხელისუფლება საქართველოს მოქალაქეების წინააღმდეგ დეზინფორმაციულ ომს ეწევა.

„კონფერენციაზე დასმული საკითხები არის უმნიშვნელოვანესი გამოწვევა საქართველოს რეალობისათვის და არამარტო საქართველოსთვის, არამედ მსოფლიოსთვის, მაგრამ საქართველოსთვის განსაკუთრებით, რადგან ინფორმაციის სანდოობას ეხება და უკვე ძალიან დიდი ხანია ჩვენი ხელისუფლება დეზინფორმაციულ ომს ეწევა საქართველოს მოქალაქეების წინააღმდეგ, ამიტომ კონკრეტული მექანიზმების შემუშავება ამის წინააღმდეგ ძალიან რთულია, როდესაც ხელისუფლება ამ პროცესში შენი მოკავშირე არ არის, მაგრამ პრობლემების იდენტიფიცირება და სამომავლო გზების დასახვა ძალიან მნიშვნელოვანია.

ხელისუფლება არის აბსოლუტურად გაუმჭვირვალე, არ გრძნობს ანგარიშვალდებულებას საზოგადოების წინაშე და უსაფრთხოების საკითხებთან დაკავშირებით არანაირი ხედვა და სტრატეგია არ აქვს. რუსეთთან მიმართებაში მხოლოდ იმაზეა საუბარი, რომ ომი არ გვაქვს საქართველოში და ეს არ არის გამოსავალი. შესაძლოა, ქვეყანა განადგურდეს ომის გარეშეც“, - განაცხადა კორძაიამ.