მნიშვნელოვანია ოპოზიციამ მოახერხოს გაერთიანება, კონსოლიდირება - საუბარი არ არის ინსტიტუციონალურ გაერთიანებაზე, არამედ საერთო სტრატეგიის შემუშავებაზე, რომ ხალხთან ერთად უზრუნველვყოთ "ქართული ოცნების" ჩამოშორება ხელისუფლებიდან, - ამის შესახებ ჟურნალისტებთან "ნაციონალური მოძრაობის" დეპუტატმა ლევან ბეჟაშვილმა "ნაციონალური მოძრაობის" თავმჯდომარის ლევან ხაბეიშვილის განცხადების კომენტირებისას აღნიშნა, რომლის თანახმად, "ნაციონალურ მოძრაობას" აქვს ივანიშვილის დამარცხების გასაღები, ოპოზიცია კი უნდა გაერთიანდეს და პარტიებმა სწორედ "ნაციონალურ მოძრაობასთან" უნდა ისაუბრონ.

ბეჟაშვილი ხაზს უსვამს, რომ პარტიის შიდა არჩევნებით, რომელშიც მონაწილეობა 50 ათასმა ადამიანმა მიიღო, კიდევ ერთხელ დამტკიცდა ის რესურსი, რომელიც ამ პარტიას გააჩნია და „ნაციონალური მოძრაობა" მზად არის საკუთარი რესურსით და პლატფორმებით დაეხმაროს ოპოზიციის კონსოლიდაციას "ქართული ოცნების" წინააღმდეგ. ბეჟაშვილი ხაზს უსვამს იმასაც, რომ მნიშვნელოვანია მიხეილ სააკაშვილის ფაქტორიც და არ უნდა ისმენდნენ ოპოზიციური პარტიებისგან თუ ვისთან ერთად არ დადგებიან.

„ახლა ამოცანა არის ოპოზიციიდან ჩვენს პარტნიორებთან შევიმუშაოთ საერთო სტრატეგია იმისათვის, რომ ქვეყნის წინაშე არსებული საფრთხეებიდან გამომდინარე მაშინ, როცა „ქართული ოცნება" აწარმოებს ანტიდასავლურ პოლიტიკას, როცა პოლიტპატიმრები ჰყავს, ქვეყნის დასავლური კურსის ცვლილება ხდება ფაქტობრივად, მნიშვნელოვანია ოპოზიციამ მოახერხოს გაერთიანება, კონსოლიდირება, საუბარი არ არის აქ ინსტიტუციონალურ გაერთიანებაზე, საუბარია საერთო სტრატეგიის შემუშავებაზე, რომ ხალხთან ერთად უზრუნველვყოთ "ქართული ოცნების" ჩამოშორება ხელისუფლებიდან. ამისთვის მზად ვართ "ნაციონალური მოძრაობა," რომ მთელი ჩვენი რესურსი, პლატფორმები დავახმაროთ ოპოზიციას იმისთვის, რომ მოხდეს კონსოლიდაცია, გაერთიანება. ამ პროცესში მნიშვნელოვანია ბუნებრივია, მიხეილ სააკაშვილის ფაქტორის გათავისება და გათვალისწინება, რადგან პოლიტიკური პარტიებისგან არ უნდა ვისმენდეთ, რომ მიხეილ სააკაშვილის პარტიაა ან იმის პარტიაა, ამასთან არ დავდგებით, იმასთან არ დავდგებით, მნიშვნელოვანია ყველა პოლიტიკური განსხვავება გვერდზე გადავდოთ და მოვახდინოთ კონსოლიდირება მთავარ ეროვნულ საფრთხეზე“, - განაცხადა ბეჟაშვილმა.

რაც შეეხება ზოგიერთი პოლიტიკური პარტიის უარყოფით პოზიციას "ნაციონალურ მოძრაობასთან" სისტემურ თანამშრომლობაზე, ბეჟაშვილი აცხადებს, რომ "ნაციონალური მოძრაობა" მზად არის მათი ინტერესები გაითვალისწინოს, რომელიც რიგ შემთხვევაში შეიძლება იყოს პარლამენტში რამდენიმე წარმომადგენლით შესვლა.

ის ასევე გამოეხმაურა ირაკლი ღარიბაშვილის განცხადებას, რომ ოპოზიცია ძლიერად დამარცხდება 2024 წელს და აღნიშნა, რომ ღარიბაშვილი და "ქართული ოცნება" წინააღმდეგობაში მოდის მოსახლეობის ინტერესთან, რისთვისაც არჩევნებზე ხალხი გასცემს პასუხს.