პაატა მანჯგალაძე - როცა სანქციებს ხარ მიერთებული და ხელისუფლება თავს იწონებს, რომ სანქციებს მიერთებული არაა, ბუნებრივია, პარტნიორებს კითხვები ექნებათ
გვერდის ავლაზე ლაპარაკია მაშინ, როცა სანქციებს ხარ მიერთებული და ღარიბაშვილი თავს იწონებს, რომ ეკონომიკურ სანქციებს მიერთებული არაა - ბუნებრივია, პარტნიორებს აქვთ კითხვები, - ამის შესახებ „სტრატეგია აღმაშენებლის" დეპუტატმა, პაატა მანჯგალაძემ განაცხადა, რითაც აშშ- ის სახელმწიფო დეპარტამენტის სანქციების მთავარი კოორდინატორის, ჯიმ ობრაიენის განცხადებას გამოეხმაურა, რომელმაც სანქციების აღსრულების კუთხით არსებულ ვითარებაზე ისაუბრა და საქართველო პრობლემურ ქვეყნებს შორის დაასახელა.
მანჯგალაძის თქმით, ხელისუფლების პოლიტიკა საფრთხეს უქმნის ქვეყანას.
„სანქციების გვერდის ავლაზე საუბარი შეიძლება მაშინ, როცა ქვეყანა მიერთებულია სანქციებს სრულყოფილად - ღარიბაშვილი თავს იწონებს, რომ ეკონომიკურ სანქციებს მიერთებული არაა, არც სანქცირებული პირების ბაზა აქვთ და არც ფრენებთან დაკავშირებულ სანქციებს არ უერთდებიან. საქართველოდან გაზრდილია ორმაგი დანიშნულების, მაგალითად, მიკროჩიპების და სხვა ელემენტების გატანა სომხეთში და ყაზახეთში და ბუნებრივია, კითხვებს სვამენ ჩვენი პარტნიორები. გვერდის ავლაზე ლაპარაკია მაშინ, როცა სანქციებს ხარ მიერთებული და ხელისუფლება ღიად ამბობს, არ ვუერთდებით და რუსეთის მხარეს ვართო. ქვეყნის დასანქცირება არ მინდა, მაგრამ ღარიბაშვილი რომ დაასანქცირონ, მხარს დავუჭერ ამას,“ - განაცხადა მანჯგალაძემ.
