შოთა გეწაძე მოსამართლის თანამდებობის დატოვებას ადასტურებს და აცხადებს, რომ მუშაობას შვეიცარიაში საქართველოს დესპანის პოზიციაზე გააგრძელებს
თბილისის სააპელაციო სასამართლოს უკვე ყოფილი მოსამართლე, შოთა გეწაძე საქმიანობას დიპლომატიურ სამსახურში გააგრძელებს.
როგორც შოთა გეწაძემ “ინტერპრესნიუსს” განუცხადა, ის შვეიცარიის კონფედერაციაში დესპანად იმუშავებს.
„ვადასტურებ ინფორმაციას. მუშაობას გავაგრძელებ საგანგებო და სრულუფლებიან დესპანად შვეიცარიის კონფედერაციაში.
ცვლილებების დრო იყო ჩემს და ჩემი ოჯახის ცხოვრებაში“, - განაცხადა შოთა გეწაძემ და იქვე აღნიშნა, რომ გადაწყვეტილების მიღებისას მასზე "არანაირი ზეწოლა არ ყოფილა".
გეწაძის მიერ მოსამართლის თანამდებობის დატოვების შესახებ ინფორმაცია დღეს გავრცელდა.
შოთა გეწაძე თბილისის სააპლეციო სასამართლოს ადმინისტრაციულ საქმეთა პალატის მოსამართლის თანამდებობაზე 2015 წლიდან მუშაობდა.
