საქართველოს განათლებისა და მეცნიერების მინისტრმა გიორგი ამილახვარმა კონკურსის „ვწერ თავისუფალ თემას“ დაჯილდოების ცერემონიაში მონაწილეობა მიიღო, ფინალისტებს მიღწეული წარმატება მიულოცა და პირველ ადგილზე გასული მოსწავლე და მისი მასწავლებელი პირადად დააჯილდოვა.

საქართველოს განათლებისა და მეცნიერების სამინისტროს ინფორმაციით, მინისტრმა სიტყვით გამოსვლისას კონკურსის ორგანიზატორებს მადლობა გადაუხადა და მოსწავლეების წახალისების კუთხით მათთვის საგანმანათლებლო-სამეცნიერო აქტივობების, სხვადასხვა კონკურსისა და მრავალფეროვანი პროექტების განხორციელების მნიშვნელობაზე გაამახვილა ყურადღება.

როგორც გიორგი ამილახვარმა აღნიშნა, მსგავსი სახის ინიციატივები და სასწავლო პროცესში არაფორმალური განათლების კომპონენტების გაძლიერება ხელს უწყობს მოზარდებში მრავალმხრივი – წერითი, აზროვნების, სოციალური, შემეცნებითი და სხვა საჭირო უნარ-ჩვევების განვითარებას.

„2023 წლის კონკურსის გამარჯვებული მოსწავლეები გახდნენ:

I ადგილი – სკოლა “აიბი მთიების” მოსწავლე ალექსანდრე გუგუნავა

II ადგილი – აკადემიკოს ილია ვეკუას სახელობის ფიზიკა-მათემატიკის ქალაქ თბილისის 42-ე საჯარო სკოლის მოსწავლე ანი ოსიძე

III ადგილი – ქალაქ თბილისის 65-ე საჯარო სკოლის მოსწავლე მარიამ კაპანაძე

აღსანიშნავია, რომ კონკურსის მონაწილე 32 მოსწავლის მიერ შექმნილი ნაშრომები, ორგანიზატორების გადაწყვეტილებით, ცალკე კრებულად გამოიცემა.

კონკურსი „ვწერ თავისუფალ თემას“, ფილოლოგიის დოქტორისა და პედაგოგის, გია მურღულიას ინიციატივით, უკვე მერვე წელია მთელი საქართველოს მასშტაბით საჯარო და კერძო სკოლების X-XII კლასების მოსწავლეებისთვის იმართება და მის მთავარ მიზანს განსაკუთრებული ჰუმანიტარული ნიჭით დაჯილდოებული ახალგაზრდების გამოვლენა, მათი პოტენციალის წარმოჩენა და საზოგადოებისთვის უკეთ გაცნობა წარმოადგენს.

ამასთან, კონკურსი ხელს უწყობს მოსწავლეებში სწავლისა და წიგნიერების მიმართ ინტერესის ამაღლებას და ჰუმანურ ღირებულებებზე ორიენტირებული, სამოქალაქო, შემოქმედებითი და კრიტიკული აზროვნების განვითარებას”, - ნათქვამია ინფორმაციაში.