რატომ სჭირდება მას [პრეზიდენტს] ინსტიტუციური გარანტიების დაკნინება, ეს მე არ ვიცი, - ამის შესახებ „ქართული ოცნების“ თავმჯდომარემ ირაკლი კობახიძემ განაცხადა, რითაც გამოეხმაურა პრეზიდენტის ვეტოს „ეროვნული ბანკის შესახებ“ ორგანულ კანონში ცვლილებებზე.

მისი თქმით, პირველი ვიცე-პრეზიდენტის თანამდებობის დამატება საჭიროა იმისთვის, რომ ეროვნული ბანკი ინსტიტუციურად გამყარდეს.

„მარტივად რომ ავუხსნათ საზოგადოებას, ერთადერთი განსხვავება ვეტოსა და ჩვენს კანონპროექტს შორის - ჩვენი კანონპროექტი ითვალისწინებს პირველი ვიცე-პრეზიდენტის თანამდებობის დამატებას და ვეტო ითვალისწინებს იმას, რომ ეს თანამდებობა არ დაემატოს. მეტი განსხვავება არ არის. პირველი ვიცე-პრეზიდენტის თანამდებობის დამატება არის საჭირო ერთადერთი რამისთვის, რომ ინსტიტუციურად გამყარდეს ეროვნული ბანკი, ერთადერთი მიზანი აქვს ამას და ეს ძალიან მარტივად ახსნადია როგორც ინსტიტუციური, ასევე იურიდიული თვალსაზრისით. რაც შეეხება პრეზიდენტს - რატომ სჭირდება მას ინსტიტუციური გარანტიების დაკნინება, ეს მე არ ვიცი“, - განაცხადა კობახიძემ.