ევროკავშირი-საქართველოს საპარლამენტო ასოცირების კომიტეტის წევრმა, გიორგი ჩაკვეტაძემ პარლამენტის პლენარულ სხდომაზე იმ გზავნილებზე ისაუბრა, რომელიც ქართული დელეგაციის წევრებმა, ბრიუსელში ასოცირების კომიტეტის მე-12 შეხვედრაზე გაახმოვანეს.

მისი თქმით, ევროკომისიის 12-პუნქტიან რეკომენდაციას ჯერჯერობით მხოლოდ „ქართული ოცნება“ ასრულებს.

„ქართულმა დელეგაციამ ჩვენ პარტნიორებს სამი ძირითადი გზავნილი გავაცანით. პირველი, ეს არის, რომ ჯერჯერობით მხოლოდ „ქართული ოცნება“ ასრულებს 12 პუნქტს. მეორე არის, რომ არც ერთი პირის, მათ შორის არც ყოფილი პრეზიდენტის სისხლის სამართლებრივი საქმე და ბედი არ შეიძლება გახდეს ჩვენი ევროპული მომავლის საპირწონე და მესამე, რასაც ჩვენ ჩვენს პარტნიორებს ვეუბნებოდით და ვეუბნებით არის, ის რომ დეპოლარიზაცია შეუძლებელია დაასრულოს კანდიდატის სტატუსის მინიჭებამ, რომელიც ჯერ კიდევ შარშან უნდა მიგვეღო“, - აღნიშნა გიორგი ჩაკვეტაძემ.

გიორგი ჩაკვეტაძემ სიტყვით გამოსვლისას ასევე, სალომე სამადაშვილს მიმართა: „ქალბატონი სალომე იყო დიპლომატი და ევროკავშირში ჩვენს ქვეყანას წარმოადგენდა. რამდენიმე კვირის წინ ჩვენ ისიც კი ვნახეთ, რომ ეს ადამიანი თავისი ქვეყნის დასანქცირებას ითხოვდა და მაინტერესებს, ეს როგორი ევროპული ღირებულებაა და როგორ წარმოუდგენია კანდიდატის სტატუსის მიღება ოპოზიციის ამ ტიპის მონაწილეობით ამ პროცესში“.