მამუკა მდინარაძე - თუ შეიძლება პარლამენტს პირველი ვიცე-სპიკერი ჰყავდეს და სხვა ინსტიტუტების ხელმძღვანელებს პირველი მოადგილე, რატომ არის წარმოუდგენელი უბედურება თუ ეროვნული ბანკის პრეზიდენტს ეყოლება? - ასეთ მსჯელობაში შესვლა მართლა გასაკვირია
ეროვნულ ბანკთან დაკავშირებით ხელისუფლებას თავისი წილი პასუხისმგებლობა გააჩნია, ამ პასუხისმგებლობის ფარგლებში ჩვენ პრეზიდენტის ვეტოს დავძლევთ, - ამის შესახებ ფრაქცია “ქართული ოცნების“ თავმჯდომარემ მამუკა მდინარაძემ განაცხადა.
მდინარაძის თქმით, პარლამენტის მიერ მიღებულ კანონზე ვეტოს დაძლევა საბოტაჟის პრევენციის, მკაფიოობისა და გამჭვირვალობის უზრუნველყოფის მიზნით ხდება.
“მართლა გასაკვირი და წარმოუდგენელია, თუ რატომ იწვევს გაოგნებას ის, რომ ეროვნული ბანკის პრეზიდენტს პირველი მოადგილე ჰყავდეს. თუ შეიძლება პარლამენტს პირველი ვიცე-სპიკერი ჰყავდეს, ასევე ნებისმიერ სხვა ინსტიტუტის ხელმძღვანელს პირველი მოადგილე ჰყავდეს, თურმე წარმოუდგენელი უბედურება იქნება თუკი პირველი მოადგილე ეროვნული ბანკის პრეზიდენტს ეყოლება. ასეთ მსჯელობაში შესვლა მართლა გასაკვირია“, - განაცხადა მამუკა მდინარაძემ.
პარლამენტის პლენარულ სხდომაზე “ეროვნული ბანკის შესახებ“ კანონში ცვლილებების პროექტზე პრეზიდენტის ე.წ. მოტივირებული შენიშვნების განხილვა მიმდინარეობს.
სალომე ზურაბიშვილის მოტივირებულ შენიშვნებს დეპუტატებს პრეზიდენტის საპარლამენტო მდივანი გიორგი მსხილაძე აცნობს.
პრეზიდენტმა ხელი არ მოაწერა უმრავლესობის ინიციატივით მიღებულ საკანონმდებლო ცვლილებებს, რომლის თანახმად, ეროვნული ბანკის საბჭოში ახალი აღმასრულებელი თანამდებობის - პირველი ვიცე-პრეზიდენტის პოსტის შემოღება ხდება. ეროვნული ბანკის პირველი ვიცე-პრეზიდენტი ეროვნული ბანკის პრეზიდენტის არყოფნის შემთხვევაში მის მოვალეობას შეასრულებს.
პრეზიდენტის მიერ წარდგენილი მოტივირებული შენიშვნები კანონის მოქმედი რედაქციის უცვლელად შენარჩუნებას გულისხმობს. პრეზიდენტი პარლამენტს სთავაზობს, რომ პირველი ვიცე-პრეზიდენტის თანამდებობა არ იქნას შემოღებული და ეროვნული ბანკის პრეზიდენტის არყოფნის დროს ერთ-ერთი ვიცე-პრეზიდენტის მიერ მისი მოვალეობის შესრულების საკითხი ეროვნული ბანკის საბჭომ გადაწყვიტოს.
პრეზიდენტის მიერ მოტივირებული შენიშვნებით დაბრუნებული კანონი პარლამენტის პლენარულ სხდომაზე ერთი მოსმენით მიიღება. პირველ რიგში კენჭი სწორედ პრეზიდენტის მიერ მოტივირებული შენიშვნებით დაბრუნებულ კანონს ეყრება. თუ პარლამენტი პრეზიდენტის შენიშვნებს არ მიიღებს, კენჭი კანონის პირვანდელ რედაქციას ეყრება.
კანონი მიღებულად ჩაითვლება, თუ მას მხარს პარლამენტის სრული შემადგენლობის უმრავლესობა დაუჭერს.
მმართველი უმრავლესობა სალომე ზურაბიშვილის ვეტოს დაძლევისთვის ემზადება.
