ნებისმიერი ადამიანი დაგიდასტურებთ, რომ პირველი ვიცე-პრეზიდენტი და ორი ვიცე-პრეზიდენტი ჯობია სამ ვიცე-პრეზიდენტს - ეს რომ გახდა ვეტოს საგანი ყველაფერი მიანიშნებს იმაზე, რომ პოლიტიკური ინტერესები იყო ამის უკან, - ამის შესახებ „ქართული ოცნების“ თავმჯდომარემ, ირაკლი კობახიძემ „ეროვნული ბანკის შესახებ“ კანონში შეტანილ ცვლილებებთან დაკავშირებით განაცხადა.

როგორც კობახიძე აღნიშნავს, წარმოუდგენელია, როდესაც ამ საკითხით „ვიღაცები გაოგნებული არიან“.

„იყო ორი დოკუმენტი. ერთი იყო პრეზიდენტის ვეტოს დოკუმენტი და მეორე ჩვენ მიერ მიღებული კანონი. ერთადერთი განსხვავება ამ ორ დოკუმენტს შორის იყო ის, რომ ჩვენი კანონი ითვალისწინებდა პირველ ვიცე-პრეზიდენტსა და ორ ვიცე-პრეზიდენტს, პრეზიდენტის დოკუმენტი კი ითვალისწინებდა სამ ვიცე-პრეზიდენტს. მარტივად ნებისმიერ იურისტს ჰკითხეთ, რა უფრო ჯობია - პირველი ვიცე - პრეზიდენტი და ორი ვიცე-პრეზიდენტი ინსტიტუციისთვის, თუ სამი ვიცე-პრეზიდენტი. ნებისმიერი ადამიანი დაგიდასტურებთ, რომ პირველი ვიცე-პრეზიდენტი და ორი ვიცე-პრეზიდენტი არის უკეთესი, ვიდრე სამი ვიცე-პრეზიდენტი. ასეთ ანაბანას დონეზე გვაქვს საუბარი. ეს რომ გახდა ვეტოს საგანი ყველაფერი მიანიშნებს იმაზე, რომ პოლიტიკური ინტერესები იყო ამის უკან. უბრალოდ წარმოუდგენელია, როდესაც მით უმეტეს ვიღაცები არიან გაოგნებული. პირველი ვიცე-პრეზიდენტი და ორი ვიცე-პრეზიდენტი ჯობია სამ ვიცე-პრეზიდენტს. ეს არის ანბანური ჭეშმარიტება. ამაზე გვიწევს სამწუხაროდ, დისკუსია პარლამენტში,“ - განაცხადა კობახიძემ.