პარლამენტის წევრებს გთავაზობთ, ნატოს წევრ ქვეყნებს, ვილნიუსის სამიტის წინ, ერთობლივი მიმართვა გავუგზავნოთ, - ასე მიმართა დეპუტატებს ოპოზიციონერმა დეპუტატმა, თეონა აქუბარდიამ პარლამენტის პლენარულ სხდომაზე “თავისუფალი ტრიბუნის“ ფორმატში სიტყვით გამოსვლისას.

აქუბარდიას განცხადებით, საქართველოს პარლამენტის დეპუტატების ერთობლივი მიმართვით, კიდევ ერთხელ დაფიქსირდება პოლიტიკური ნება და მხარდაჭერა ნატო-ში გაწევრიანების კუთხით.

„პარლამენტის წევრებს გთავაზობთ, ნატოს წევრ ქვეყნებს, ვილნიუსის სამიტის წინ, ერთობლივი მიმართვა გავუგზავნოთ. მნიშვნელოვანი გზავნილია, არა მხოლოდ იმისა, რომ საქართველოს სურს გახდეს ნატოს წევრი, არამედ მნიშვნელოვანია, რომ ჩვენმა პარტნიორებმა პოლიტიკური და პრაქტიკული მხარდაჭერა, უკრაინასთან ერთად საქართველოსაც გამოუცხადონ, იმ ფონზე, როდესაც არის ინფორმაცია, რომ სამიტზე საქართველო უმაღლეს პოლიტიკურ დონეზე არ იქნება წარმოდგენილი, რაც ვფიქრობ, რომ მოცემულ სიტუაციაში ძალიან ცუდია.

2020 წელს ჩვენ პარლამენტში მიღებული გვაქვს საგარეო პოლიტიკის რეზოლუცია, სადაც ნატო-ში გაწევრიანების ცალკე მნიშვნელოვანი აქცენტია გაკეთებული. ეს არის თითოეული პარლამენტის კონსტიტუციური ვალდებულება და პასუხისმგებლობა, რომ ამ ერთობლივი მიმართვით, კიდევ ერთხელ დავაფიქსიროთ ჩვენი პოლიტიკური ნება და მხარდაჭერა ნატო-ში გაწევრიანების კუთხით, ისევე როგორც საერთო ღირებულებების ერთგულების კუთხით“,- განაცხადა აქუბარდიამ.

მისივე თქმით, პარლამენტის ყველა პოლიტიკურმა ჯგუფმა, ფრაქციამ, დამოუკიდებელმა დეპუტატმა უნდა გაითავისოს ის, რომ ნატო-ს წევრობა არის ეროვნული ინტერესი.

„ნატო-ში გაწევრიანება არის უსაფრთხოების და დემოკრატიის უზრუნველყოფის მნიშვნელოვანი გზა და პასუხისმგებლობით მოვეკიდოთ, სწორედ ამ კონსტიტუციურ ვალდებულებას და ქვეყნის ინტერესებიდან ამოვიდეთ. მიუხედავად ბევრი განსხვავებისა და პრობლემისა ყველაფერი გავაკეთოთო, იმისთვის რომ ერთობლივი ხელმოწერა და ნატო-ს ლიდერებისთვის ამ ყველაფრის ერთობის დემონსტრირება შევძლოთ“,- განაცხადა აქუბარდიამ.