არანაირი ნიშანი იმისა, რომ ქვეყნის საგარეო კურსს რაიმე ემუქრება, არ არსებობს - ამ გზაზე „ქართული ოცნების“ ხელისუფლებას არანაირი ხინჯი არ გააჩნია, - ეს განცხადება ჟურნალისტებთან პარლამენტის პირველმა ვიცე-სპიკერმა გია ვოლსკიმ გააკეთა.

როგორც ვოლსკიმ ამ კონტექსტში აღნიშნა, რადიკალურმა ოპოზიციამ დესტაბილიზაციის და რევოლუციური გეგმების გასამართლებლად მოიგონა, თითქოს და ქვეყნის საგარეო კურსი იცვლება.

“სხვა მხრივ ამას ვერ გაამართლებ ისე, რომ მოსახლეობის და საზოგადოების რისხვა არ დაიმსახურო. აქედან გამომდინარეობს გააფთრებული, ისტერიული მტკიცება იმისა, თითქოს საგარეო კურსს რაიმე ემუქრება. რეალობაში, ამის არანაირი ნიშნები არ არის - პირიქით! საქართველომ უფრო ადრე გააფორმა ასოცირების ხელშეკრულება, თავისუფალი ვაჭრობა ევროკავშირთან და უვიზო მიმოსვლა უფრო ადრე მიიღო, ვიდრე მოლდოვამ და უკრაინამ. ამ გზაზე არანაირი ხინჯი “ქართული ოცნების“ ხელისუფლებას არ გააჩნია“, - განაცხადა გია ვოლსკიმ.