ამ მოცემულობაში, როდესაც მეგობარ ელჩს იბარებთ და მტრულად განწყობილ ქვეყანაზე ხმას არ იღებთ, ეს ნორმალური არ არის, - ასე მიმართა ოპოზიციონერმა დეპუტატმა თეონა აქუბარდიამ პარლამენტის პლენარულ სხდომაზე „მინისტრის საათის“ ფორმატში მისულ საგარეო საქმეთა მინისტრს ილია დარჩიაშვილს.

აქუბარდიას განცხადებით, პარტნიორებთან ასეთი ქცევა და მტერთან დუმილი არ არის სტრატეგიის შესაბამისი.

„თქვენ ნორვეგიის ელჩის განცხადებაზე ისაუბრეთ და როგორ ფიქრობთ, ნორმალური იყო ის შედარება რაც პრემიერმა ღარიბაშვილმა ბრეივიკთან დაკავშირებით გააკეთა. უბრალოდ არაფერი მიუღებელი არ ყოფილა ელჩის განცხადებაში, როდესაც მან თქვა რომ შედარება არის მიუღებელი, მიხეილ სააკაშვილის გამო არა ტერორისტ ბრეივიკის გამო. ამ მოცემულობაში როდესაც მეგობარ ელჩს იბარებთ და მტრულად განწყობილ ქვეყანაზე ხმას არ იღებთ, ეს არ არის ნორმალური და ამაზე პასუხი მინდა თქვენგან და თუ შეიძლება დამეხმაროთ იმიტომ, რომ პარტნიორებთან ასეთი ქცევა და მტერთან დუმილი არ არის სტრატეგიის შესაბამისი“,- განაცხადა აქუბარდიამ.

ცნობისთვის, საგარეო უწყების ხელმძღვანელმა პარლამენტში, „მინისტრის საათის“ ფორმატში გამოსვლისას დაადასტურა, რომ საგარეო უწყებაში ნორვეგიის ელჩი სააკაშვილისთვის ჯილდოს გადაცემისა და ხელისუფლების წარმომადგენელთა განცხადებებზე მისი შეფასებების გამო დაიბარეს.