„ქართული ოცნების“ თავმჯდომარის, ირაკლი კობახიძის განმარტებით, საქართველოს რუსეთთან ურთიერთობის საკითხებში სპეციალური წარმომადგენელი ჰყავს, რაც ამ ქვეყანასთან კომუნიკაციის კუთხით დღეს ერთადერთი არხია.

მან განმარტა, რომ არ ფლობს ინფორმაციას, თითქოს საქართველო-რუსეთის საქმიანი საბჭო არსებობს.

რაც შეეხება რუსულ მედიაში გავრცელებულ ინფორმაციას, რომ რუსეთი მზად არის, ჩადოს ინვესტიცია საქართველოში ახალი სატრანსპორტო კვანძის გახსნისთვის, ირაკლი კობახიძემ აღნიშნულთან დაკავშირებით ასევე განმარტა, რომ მსგავსი ტყუილი ადრეც გავრცელდა.

„არ გამიგია. ადრეც გავრცელდა ინფორმაცია, თითქოს სპეციალური წარმომადგენელი ჰყავდა საქართველოს სავაჭრო-ეკონომიკურ ურთიერთობებში, რაც ფარსი და ტყუილი აღმოჩნდა. ჩვენ გვაქვს სავაჭრო-ეკონომიკური ურთიერთობები და ბუნებრივია, ფარგლებს მიღმა არ გავდივართ. არის კონკრეტული კომუნიკაციის არხები, მათ შორის არის სპეციალური წარმომადგენელი და ეს არის ერთადერთი არხი დღეს, რაც რუსეთთან კომუნიკაციის კუთხით გვაქვს. საქმე ეხება სავაჭრო-ეკონომიკურ და ჰუმანიტარულ საკითხებს, ეს არის ის თემები, რაზეც ბუნებრივია, კონცენტრირებული არის ურთიერთობები, მაგრამ არა ამის მიღმა, ეს არის დღევანდელი მოცემულობა“, - განაცხადა კობახიძემ.