პრეზიდენტის არათანამშრომლობითი ნაბიჯები ქვეყნისთვის საუკეთესო მიზნების განხორციელებას არ ემსახურება - ეროვნული ბანკის საბჭოს წევრების ასარჩევად საჭიროა კონსულტაციები, რათა გადაწყვეტილება ქვეყნის ფინანსური მდგრადობისათვის საუკეთესო ინტერესებზე იყოს მორგებული, - ამის შესახებ ჟურნალისტებს უმრავლესობის დეპუტატმა ირაკლი ქადაგიშვილმა განუცხადა.

ქადაგიშვილის თქმით, ის ეროვნული ბანკის საბჭოში ასარჩევად პრეზიდენტის მიერ წარდგენილი კანდიდატების ავ-კარგიანობის განხილვაში არ შევა, რადგან აღნიშნულ საკითხზე მმართველი გუნდის პრინციპი წინასწარი კონსულტაციების გავლა იყო.

„ეროვნული ბანკი და მთავრობა გაყოფილია. მათი ერთობლივად, მჭიდროდ მუშაობა დაკავშირებულია ქვეყნის ეკონომიკურ ფინანსური მაჩვენებლის განსაზღვრასთან. პოლიტიკური პასუხისმგებლობა ხელისუფლებას აკისრია და ის ამ ინსტიტუტის ფორმირების პროცესში თანამონაწილე უნდა იყოს. ეროვნული ბანკის საბჭოს წევრები პარლამენტმა უნდა აირჩიოს. ბუნებრივია, შემდგომი პასუხისმგებლობა ეკონომიკურ მდგომარეობაზე ხელისუფლებას ეკისრება და არა პრეზიდენტს, რადგან ეს არც მისი კონსტიტუციური და არც პირდაპირი მოვალეობა არ არის.

როგორც წესი, არანაირი რეალური პოლიტიკური პასუხისმგებლობა არც ეროვნულ ბანკს ეკისრება. ყველა პასუხისმგებლობა, პირველ რიგში, მთავრობას და ხელისუფლებას ეკისრება. სწორედ ამიტომ არის კონსულტაციები საჭირო, რომ გადაწყვეტილება საუკეთესო ინტერესებზე იყოს მორგებული ფინანსური მდგრადობისათვის“, - განაცხადა ირაკლი ქადაგიშვილმა.