„სტრატეგია აღმაშენებლის“ ინფორმაციით, პარტიის ლიდერები გიორგი ვაშაძე და სერგო ჩიხლაძე ვაშინგტონში უმაღლესი დონის შეხვედრებს აგრძელებენ.

პარტიის ცნობით, ოპოზიციონერი ლიდერები ამჯერად სენატის, კონგრესისა და ატლანტიკური საბჭოს წარმომადგენლებს შეხვდნენ.

როგორც „სტრატეგია აღმაშენებლის“ თავმჯდომარე გიორგი ვაშაძე აცხადებს, შეხვედრის მთავარ თემებს ორი უმნიშვნელოვანესი დოკუმენტი წარმოადგენდა. მისივე თქმით, ამერიკელი პარტნიორები მუშაობენ „საკანონმდებლო აქტზე“, რომლითაც სენატი საქართველოსთან მიმართებაში კონკრეტულ გადაწყვეტილებებს მიიღებს. როგორც პარტიის მიერ გავრცელებულ ინფორმაციაშია აღნიშნული, ასევე, განხილულ იქნა „შავი ზღვის მხარდაჭერის აქტი“, რომელიც საქართველოს მილიონობით ინვესტიციასა და ათასობით სამუშაო ადგილს მოუტანს.

გიორგი ვაშაძის თქმით, პარტნიორები საქართველოში არსებულ მძიმე სოციალურ და ეკონომიკური ვითარების შესახებ სრულყოფილ ინფორმაციას ფლობენ და ევროპული და ევროატლანტიკური ინტეგრაციის გზაზე მტკიცე მხარდაჭერას გამოხატავენ.