ბატონო შალვა, წინადადებით შემოვდივარ, როცა ეს რადიკალური ოპოზიცია ლაპარაკობს, იქნებ სტრიმზე +18 დაედოს, აღარ შეიძლება უკვე ამათი მოსმენა, - ასე მიმართა მმართველი პარტიის დეპუტატმა ირმა ზავრადაშვილმა პარლამენტის პლენარულ სხდომაზე, საკანონმდებლო ორგანოს თავმჯდომარეს შალვა პაპუაშვილს.

გარდა ამისა, მან საკუთარი გამოსვლისას პრემიერ-მინისტრ, ირაკლი ღარიბაშვილსაც, რომელიც პარლამენტში ყოველწლიურ მოხსენებას წარადგენს, დაუსვა კითხვები.

„ბატონო შალვა, წინადადებით შემოვდივარ, როცა ეს რადიკალური ოპოზიცია ლაპარაკობს, იქნებ სტრიმზე +18 დაედოს, აღარ შეიძლება უკვე ამათი მოსმენა. დიდუბის რაიონში 204-მა ახალგაზრდამ დაამთავრა ოქროს მედალზე სკოლა. ძალიან დიდ ღონისძიებაზე მშობლებთან და ოჯახის წევრებთან ერთად იყვნენ მოსულები. მე კითხვებიც იქიდან წამოვიღე და დანაბარებიც. ეს კითხვებია: რატომ არ ეძლევა სახელმწიფო გადატრიალების მუხლით დაწყებულ გამოძიებას მსვლელობა და რატომ არ ხდება იმ ადამიანების იზოლირება, რომლებმაც ისარგებლეს გულწრფელი ახალგაზრდებით და მათი საშუალებით ცდილობდნენ ქვეყნის ამოტრიალებას. მიგაჩნიათ, თუ არა რომ საჭიროა უფრო მკვეთრი განცხადებების გაკეთება იმ ძალების მიმართ, რომლებიც აქტიურად ცდილობენ გამიჯნონ ერთმანეთისგან ხალხი და მის მიერვე არჩეული ხელისუფლება, ვინც არ უნდა იყოს ის, სახელმწიფო დეპარტამენტის პრესსპიკერი თუ ევროპარლამენტი.

მაქვს კიდევ ერთი სურვილი - გისურვებთ ქვეყნისთვის კონსტრუქციულ, არამოღალატეობრივი ოპოზიციის ყოლას და პირობა, რომ პრიგოჟინის პარტიის ქართული ფილიალი, რომლის ლოგოზე „კასტილი“ უნდა იყოს, არასდროს რომ დაბრუნდება ხელისუფლებაში“, - განაცხადა ირმა ზავრადაშვილმა.