როდესაც შენ, საკუთარი ქვეყნის პროგრესს იმაზე უარესად აფასებ, ვიდრე მთავარი შემფასებელი, ევროკავშირი, ეს მეტყველებს, რომ ამ ადამიანებს მტრული დამოკიდებულება აქვთ საკუთარი ქვეყნის მიმართ, - ასე გამოეხმაურა „ქართული ოცნების“ თავმჯდომარე ირაკლი კობახიძე არასამთავრობო ორგანიზაციების შეფასების დოკუმენტს იმასთან დაკავშირებით, თუ როგორ მიდის საქართველო ევროკომისიის 12 პირობის შესრულებისკენ.

როგორც კობახიძემ აღნიშნა, კონკრეტული "ენჯეოების" წარმომადგენლები თანამედროვე სერგო ორჯონიკიძეები არიან, რომლებიც ცხადად და ღიად მტრობენ საკუთარ ქვეყანას.

"როდესაც შენ, საკუთარი ქვეყნის პროგრესს იმაზე უარესად აფასებ, ვიდრე მთავარი შემფასებელი, ევროკავშირი, ეს მეტყველებს, რომ ამ ადამიანებს მტრული დამოკიდებულება აქვთ საკუთარი ქვეყნის მიმართ, ისინი მოქმედებენ არა საქართველოს ინტერესების კარნახით, ევროკავშირის ობიექტური ინტერესების კარნახით, არამედ თავიდან ბოლომდე "გლობალური ომის პარტიის" კარნახით მოქმედებენ. ისინი არიან უცხოელი აგენტები და იმ ძალების აგენტები, ვისაც არ უნდათ საქართველოსთვის სიკეთე, კანდიდატის სტატუსის მინიჭება.

აქედან გამომდინარე, საზოგადოებამ უნდა შეაფასოს ეს ადამიანები, ისინი არიან თანამედროვე სერგო ორჯონიკიძეები, კონკრეტული "ენჯეოების" წარმომადგენლები არიან თანამედროვე სერგო ორჯონიკიძეები, რომლებიც ცხადად და ღიად მტრობენ საკუთარ ქვეყანას, სხვა არაფერია ის შეფასება, რომელიც მათ გამოაქვეყნეს საკუთარი ქვეყნის შესახებ“,- აღნიშნა კობახიძემ.

ცნობისთვის, 8 საზოგადოებრივმა ორგანიზაციამ, 28 ივნისს, რიგით მეოთხე შეფასების დოკუმენტი წარმოადგინა, თუ როგორ მიდის საქართველო ევროკომისიის 12 პირობის შესრულებისკენ. საზოგადოებრივი ორგანიზაციების შეფასებით, 2023 წლის 30 აპრილიდან 15 ივნისამდე პერიოდში სრულად არის შესრულებული ერთი პირობა, მეტწილად შესრულებულია ორი პირობა, ნაწილობრივ შესრულებულია ხუთი პირობა და შესასრულებელია ევროკავშირის ოთხი პირობა. კერძოდ, შესრულდა - ECHR-ის გადაწყვეტილებების გათვალისწინება; მეტწილად შესრულდა - ორგანიზებული დანაშაულის წინააღმდეგ ბრძოლა, გენდერული თანასწორობა; ნაწილობრივ შესრულდა - საარჩევნო და ინსტიტუციური რეფორმები, დამოუკიდებელი სასამართლო, ანტიკორუფციული ზომები, მოწყვლადი ჯგუფების დაცვა, დამოუკიდებელი სახალხო დამცველი; შესასრულებელია - სამოქალაქო საზოგადოების ჩართულობა, მედიის თავისუფლება, დეოლიგარქიზაცია, დეპოლარიზაცია.